Барон Унгерний тухай өгүүлэх “Зөвхөн намайг үхсэний дараа” нэртэй баримтат уран сайхны кино ирэх сарын 3-нд нээлтээ хийх гэж байна. Гэхдээ хаана гээч, ОХУ-ын Иркутскийн Драмын академик театрт. Тус театрынхан найруулагч Б.Баярын бүтээсэн энэхүү бүтээлийг ихэд сонирхож, нээлтийг нь өөрийн театртаа хийхийг урьжээ. Польшийн эрдэмтэн Оссендовскийн “Хүн, араатан, бурхад” номоос сэдэвлэн бүтээсэн тус киноны зураг авалтыг Швейцарь, Герман, Финланд, ОХУ, Польш, Монголд хийжээ. Харин гол дүрүүдэд манай шилдэг уран бүтээлчдээс гадна ОХУ-ын Иркутск хотын Драмын театрын жүжигчид оролцон тоглосон байна.

Сонирхуулахад, өдгөө Швейцарь, Финландад амьдарч байгаа Барон Унгерний үр хойчис болох Унгерн Фон Штернбергийнхэн болон ОХУ, Польш, Финландын түүхч эрдэмтэн, судлаачид тус киног бүтээхэд туслалцаа үзүүлсэн гэнэ. Кинонд нэрт эрдэмтэн Оссендовскийн Баронтой хамт Хүрээнд өнгөрүүлсэн ес хоногийн тухай, Барон Роман Федорович Унгерн Фон Штернберг гэж чухам хэн байсан талаар өгүүлэх юм. Тэр үнэндээ хэн байсан юм бол.