Америкийн
“Форбес” сэтгүүлээс бизнес эрхлэх боломж сайтай улс орнуудын жагсаалтыг
гаргажээ. Уг жагсаалтыг иргэдийн хувийн болон худалдааны эрх чөлөө,
хөрөнгө оруулагчдын хамгаалалт, инноваци, технологийн хөгжлийн түвшин,
албан тушаалтнуудын бизнест үзүүлэх нөлөө, татварын хувь, үнэт цаасны
зах зээлийн байдал, авлига зэрэг үзүүлэлтээр Дэлхийн банк, Дэлхийн эдийн
засгийн форум, “Freedom House”, “Heritage Foundation”, “Transparency
International” байгууллагуудын илтгэлийг үндэслэн дүгнэсэн байна.
Энэ
жилийнхэд нийт 141 орон багтсанаас Монгол Улс 64 дүгээр байр эзэлжээ.
Өнгөрсөн жил манай орон 134 орноос 63 дугаарт жагсаж байлаа. Бизнес
эрхлэх боломж сайтай орны жагсаалтыг Шинэ Зеланд тэргүүлж, Дани,
Хонконг, Сингапур, Канад, Ирланд, Швед, Норвеги, Финланд, Их Британи
удаалжээ. Харин манай хойд хөрш 105, БНХАУ 96 дугаар байр эзэлсэн байна.
