Бичлэгийн тоо 3,329
“Сонгодог
мюзикл” продакшн Монгол, Францын соёлын төвтэй хамтран “Ромео,
Жульетта” мюзиклийг ирэх арванхоёрдугаар сарын 1, 2-нд тоглохоор болжээ.
Тэд дэлхийг байлдан дагуулсан франц найруулагч Жерард Пресгурвичийн
амилуулсан мюзиклийг эх хэлнээ орчуулан тоглохоор өнгөрсөн жилийн
зургаадугаар сараас ажиллаж байгаа гэнэ. Тус продакшны найруулагч
З.Лхагвадорж мюзиклийг найруулж байгаа ба Дуурь бүжгийн эрдмийн театр,
Улсын драмын эрдмийн театр, Цэргийн дуу бүжгийн эрдмийн чуулга болон
рок, попын хамтлаг, дуучид дүр бүтээж байгаа аж.
“Сонгодог мюзикл” продакшныхан одоогоор гол дүрийн жүжигчдийнхээ нэрийг нууцалж байгаа. Гэхдээ УДЭТ-ын жүжигчин Б.Нармандах, “Номин талст” хамтлагийн дуучин Д.Батсүх, ДБЭТ-ын гоцлооч Ч.Түмэндэмбэрэл нар “Ромео Жульетта хоёр” мюзиклд дүр бүтээж байгаа юм билээ. Мюзиклийг зохиогчийн албан ёсны зөвшөөрөлтэйгээр Азид анх удаа орчуулан, тоглохоороо онцлогтой. Тус продакшн өмнө нь “Сонгодог мюзиклийн дээжис”, “Зуун дамжсан аялгуу”, “Найрал дуучдын сонгодог тоглолт” зэргийг зохион байгуулж байсан туршлагатай.
Үүнээс гадна “Монгол туургатан” театрын найруулагч Ч.Ганхуяг ч бас “Ромео Жульетта” мюзиклийг сонгодог хувилбараар нь амилуулж буй. Тэрбээр энэ бүтээлээ мэргэжлийн театруудын дунд зохион байгуулж буй уралдаанд сойх гэж байгаа. Тэгэхээр сүүлийн үед Монголын урлагийнхан сонгодог бүтээл рүү, ялангуяа У.Шекспирийн “Ромео Жульетта” руу хошуурч байна. Өнгөрсөн жил гэхэд УДЭТ-ын ерөнхий найруулагч Н.Наранбаатар энэ жүжгийг найруулан тавихаар төлөвлөж гол дүрийн жүжигчдээ сонгосон ч санхүүгийн бэрхшээлээс шалтгаалан хойшлуулсан юм.
mmmmmmmmmmmmmmm