Монголчууд бид ямааны ноолуур гээд шуураад байдаг болохоос арьсыг нь тоож ашигладаггүй шахам. Харин монгол ямааны арьсаар тансаг зэрэглэлийн чамин бүтээгдэхүүн үйлдвэрлэж, тэр нь бусад орныхоос чанараараа илүү болохыг Францын хамгийн эртнийхэд тооцогддог “Ростан” группийн ерөнхийлөгч Жак Ростан баталж чадсан. Арьс боловсруулах байгальд ээлтэй аргаараа 220 жилийн түүхийг бүтээж буй тус үйлдвэр энэ удаа монгол ямааны арьс, түүний чанарыг дэлхий нийтэд сурталчлахаа мэдэгдэв.

Жак Ростан олон төрөлт олон улсын буухиа тэмцээнийг Монголд анх удаа зохион байгуулах гэж буй талаар сонирхолтой ярилцлагыг “Өнөөдөр” сонин өнгөрсөн дөрөвдүгээр сард хүргэж байсан. Уг тэмцээн нь ямар ч машин, техникгүй, байгальд хоргүй, эко аялал гэдгээрээ онцлог. Тэгвэл тэмцээний хөтөлбөрт бага зэрэг өөрчлөлт оржээ. Тэмцээн Цамбагарав ууланд болох байсан бол Горхи Тэрэлжийн байгалийн цогцолбор газарт зохиогдохоор болжээ.

Учир нь гадаадын оролцогчид ямар нэгэн байдлаар мориноосоо унахад Цамбагарав ууланд нисдэг тэрэг буух боломжгүй тул хүндрэл учирч болозошгүй аж. Тиймээс уг шийдвэрийг өнгөрсөн тавдугаар сард БОАЖЯ-наас гаргажээ. Мөн энэ тэмцээн анх удаа зохион байгуулагдаж байгаа тул эрсдэл бага гаргах үүднээс завиар хийх аяллыг хасах зөвлөмжийг тус яам гаргасан гэнэ.

Харин оролцогчдын ашиглах морь, дугуй зэргийг “Ростан” групп өөрсдөө бэлтгэжээ. “Rostaing Mongolian Trophy 2012” наймдугаар сарын 26-31-нд болж, шагнал гардуулах ёслол ирэх са рын 31-нд Сүхбаатарын талбайд болно. Нэлээд сонирхолтой, өвөрмөц шийдэлтэй цогц арга хэмжээ болохыг Жак Ростан амлав. Уг ёслолд Францын шигшээ багийн тамирчин, 1998 оны дэлхийн аварга, ФИФА-гийн элч Кристиан Карамбө, Японы загварын алдартэй нэвтрүүлгийн хөтлөгч Эрико Накамура нар оролцох бөгөөд Францын үндэсний “France radio”-гийн алдарт сэтгүүлч Эмануйл Ланглова оролцож, сурвалжлах юм байна.

Хамгийн сонирхолтой нь Жак Ростан “Rostaing Mongolian Trophy 2012”-т оролцох хүндэт зочин Кристиан Карамбөд зориулж шинэ спорт цүнх зохион бүтээжээ. Харин тэр цүнхийг мөн монгол ямааны арьсаар хийсэн гэнэ. Түүнчлэн тэмцээнд оролцогч бүрт ямааны арьсаар бүтээсэн бээлий, цүнх зэргийг бэлэглэж, Монгол ямааны арьсны чанарыг гайхуулж, сурталчлах ажээ. Тэмцээний арга хэмжээ болон оролцогчдын талаарх мэдээллийг бид цувралаар хүргэх болно.

Олон улсын нэр хүндтэй “Парисын үдэш” арга хэмжээнд энэ жил Монгол Улсыг хүндэт зочноор урьжээ. Энэ арга хэмжээнд Францад алдаршиж буй Монголын загвар зохион бүтээгч М.Цолмандахын шинэ коллекцыг “Азийн модел” агентлагын загвар өмсөгчид өмсөж, танилцуулах юм байна.