Бразилийн Рио де Жанейро хотноо энэ сарын 13-22-нд болсон “Рио+20” бага хуралд манай улсаас Гадаад харилцааны яамны Төрийн нарийн бичгийн дарга Б.Батхишиг тэргүүтэй Засгийн газрын төлөөлөгчид оролцохоор явсан билээ. Тэгвэл манай төлөөлөгчид зургаадугаар сарын 13-15-нд зохион байгуулсан Тогтвортой хөгжлийн асуудлаарх НҮБ-ын бага хурлаас гарах төгсгөлийн баримт бичиг буюу Ногоон эдийн засгийн олон улсын бодлогын III хэлэлцүүлэг, зургаадугаар сарын 20-22-нд зохион байгуулагдсан Тогтвортой хөгжлийг хангах, ядуурлыг бууруулах ногоон эдийн засгийн тунхаглалыг батлах дээд хэмжээний чуулга уулзалтад тус тус оролцсон байна.

Бага хурлын үеэр манай Засгийн газар өнгөрсөн 20 жилд Монгол Улсын тогтвортой хөгжлийг хангах ажлын хүрээнд авч хэрэгжүүлсэн арга хэмжээ, гарсан ахиц дэвшил, ололт амжилт, тулгарсан хүндрэл бэрхшээлийн талаар олон улсын хэмжээнд танилцуулжээ. Түүнчлэн ногоон эдийн засгийг хөгжүүлэх зорилгоор Монголын сэргээгдэх эрчим хүчний нөөцийг олон улсын хэмжээнд сурталчлах, шинэ эх үүсвэрийг бий болгох, ашиглах, экспортлох боломжийн талаар олон улсын төлөөлөгчдөд мэдээлэл хийх, дэмжлэг авах, хамтран ажиллах боломжийг нээх зорилгоор сэдэвчилсэн хэлэлц үүлэг зохион байгуулав.