Их Британийн BBC радио, Шотландын Яруу найргийн номын сантай хамтран Лондоны олимпийн наадамд оролцох 204 орны яруу найрагчдын бүтээлээс сорчлон олон нийтэд хүргэх төсөл хэрэгжүүлж байна. “Poetry 2012, The Written World” хэмээх уг төслийн явцад орон бүрээс сонгосон нэг яруу найрагчийн шүлгийг англи хэлнээ хөрвүүлэн, эфирээр цацаж, BBС радио болон Шотландын Яруу найргийн номын сангийн вэб хуудаснаа долоо хоногийн турш байрлуулах гэнэ. Манай улсаас соёлын гавьяат зүтгэлтэн, яруу найрагч Г.Мэнд-Ооёогийн “Ертөнцийн явдал” шүлгийг сонгожээ. Г.Мэнд-Ооёогийн “Гэрэлтэх агшин бүр” нэртэй яруу найргийн түүвэрт багтсан уг шүлгийг Саймон Вэккхам Смит англи хэл рүү орчуулан “A Witch of White Mist” шүлгийн түүвэртээ хэвлүүлжээ. Энэ шүлгийг өнөөдөр BBC радиогийн сонсогчдод хүргэнэ.

Сонирхуулахад, уг төсөлд багтсан шүлгүүдийг зурагт хуудас, ил захидал, түүвэр зохиол зэрэгт хэвлэх бөгөөд олимпийн нээлтийн үеэр тэдгээр бүтээл үүдээр “бороо” оруулах тухай мэдээлж байна. Шүлэг бүхий номын хавчуурга тэнгэрээс унаж байхад хэн тайван байж чадах билээ. Энэ бол BBC радиогийн дэвшүүлж буй “Шүлгээр дэлхийн улс үндэстний хосгүй нэгэн хөргийг бүтээе” төслийн нэгэн хэсэг юм. Гуравдугаар сараас эхэлсэн уг төсөл есдүгээр сар хүртэл үргэлжилнэ.

Ертөнцийн явдал

Үүрийн бялзуухайтай цуг морь мориндоо мордоцгооно

Үдшийн шаазгайтай цуг уяа уяандаа бууцгаана

Зуун зуун жил арьс элдэж, мод огтолж сэлэм давтана

Зул бөхөж, бас мандаж дараачийн хүмүүс түүхийг давтана

Голын ус булингартаж нэг, тунгалагшиж нэг урсана.

Галын цучил мөрний хөвөөнд нэг унтарч, нэг асна.

Жил жилийн явдал суудалдаа дэлхийн чулуу элэгдэнэ.

Жирийн л нэг өдрүүдийн тоосондоо хүний явдал булагдана.

Ялан мандахын өглөөгүүр морь мориндоо мордоцгооно.

Ядарч сульдахын үдшээр уяа уяандаа бууцгаана

Мянга мянган жил сэлэм ирлэж, булш малтаж, зул барина.

Маргааш болоход сурсан зангаараа л мориндоо мордоно

Хот балгад нэг нь байгуулна.

Хорссон нөгөө нь галдан шатаана.

Хоёулаа дайтаж жанжид болно.

Хожим нь зөвхөн домог л үлдэнэ.

Ертөнцийн явдал энэ мэт, элэрсэн сэлэм шиг давтагдаж

Ердийн оройн хоолны даруулгатай цуг мартагдана.