Бичлэгийн тоо 3,329
Сангийн яамнаас өнгөрсөн дөрөвдүгээр сард орон сууц худалдан авагчдад зориулан зээлийн банк байгуулах санал гаргасан билээ. Энэ асуудлыг удахгүй Засгийн газрын хуралдаанаар хэлэлцэхээр болжээ. “100 мянган айлын орон сууц” хөтөлбөртэй холбогдуулан арилжааны банк болон иргэдийн хооронд үүсэх асуудлыг шийдвэрлэх арга нь зээлийн банк гэж үзэж байгаа аж.
Энэ талаар Сангийн яамны Санхүү, эдийн засгийн бодлогын газрын дарга Б.Батбаяраас тодруулахад “Зах зээлд хямд өртөгтэй орон сууцны зээл олгох, барилгын үнийг хөөс болгохоос сэргийлэх зорилгоор Орон сууцны зээлийн банк байгуулах нь ач холбогдолтой. Өмнө нь зөвхөн дунд болон дундаас дээш орлоготой иргэд өөрсдөө арилжааны банкинд ханддаг байсан бол орон сууцны тусгай банк нь бага болон түүнээс дээш орлоготой иргэдэд илүү ойртож ажиллахаараа онцлог юм. Зээлийн баталгаагаа хийж чадахгүй байгаа иргэд энэ банкинд хандах учраас бусад арилжааны банкинд нөлөөлөхгүй. Орон сууцны банк байгуулах техник, эдийн засгийн үндэслэл, нөхцөлийг судлан бэлтгэл ажлын шатандаа явж байна” гэв.
