Сүмочид болон үндэсний бөхчүүдийн хооронд зохиогдох “Их Монголын алтан одод-2” сагсан бөмб өгийн нөхөрсөг шоу тоглолтод оролцох сүмочид өчигдөр орой эх орондоо ирлээ. Их аварга Хакүхо М.Даваажаргал, Какүрюү М.Ананд, Асасэкирюү Б.Дашням, Рюүо Э.Санчирболд, Кёкүшюхо Т.Эрдэнэбаатар нар өчигдөр “Чингис хаан” олон улсын нисэх онгоцны буудалд газардсан бол өнөөдөр Харүмафүжи Д.Бямбадорж, Кёкүтэнхо Н.Цэвэгням, Токитэнкү А.Хүчитбаатар нар ирэх аж. Эх орондоо буяны үйлсэд зориулсан нөхөрсөг тэмцээн зохиохоор ирж буй сүмочдыг даян аварга Г.Өсөхбаяр, арслан Х.Мөнхбаатар, Д.Ганхуяг, Г.Эрхэмбаяр нар тосож авлаа. “Их Монголын алтан одод-2” сагсан бөмбөгийн шоу тоглолт хоёр хэсгээс бүрдэх бөгөөд урлаг, спортын холимог оддын багт Олимпийн аварга Н.Түвшинбаяр, Э.БадарУуган тэргүүтэй алдартнууд оролцоно.
Бөхчүүдийн багт сүмочдоос гадна даян аварга Г.Өсөхбаяр, аварга С.Мөнхбат, арслан Х.Мөнхбаатар, Д.Ганхуяг, гарьд Н.Ганбаатар, Ж.Бат-Эрдэнэ, заан Д.Рагчаа, М.Өсөхбаяр, Ч.Санжаадамба нар багтжээ. Багууд сагсан бөмбөгөөр өрсөлдөхөөс гадна өөр олон сонирхолтой тэмцээн мөн зохиох аж. Үзэгчдийн дундах тэмцээний ялагч их аварга Хакүхогоос гарын бэлэг авна. Маргааш Монгол бөхийн өргөөнд болох уг тоглолтыг “Мон лаа” групп ивээн тэтгэж, “Хакүхо” сан, “TLG-13”, “Амжилтын төлөө хамтдаа” ТББ-аас хамтран зохион байгуулж буй. Тоглолтын бүх орлогыг буяны үйлсэд зориулах бөгөөд ЭХЭМҮТ-д 20 гаруй сая төгрөгийн тоног төхөөрөмж бэлэглэж, Нярайн тасгийг тохижуулах бол Хүүхэд асран хүмүүжүүлэх төвийн 1200 сурагчид хичээлийн хэрэгсэл гардуулахаар бэлтгэжээ.
