Бичлэгийн тоо 3,329
Монгол
Улсын Засгийн газраас баталсан “Архив, албан хэрэг хөтлөлтийн үйл
ажиллагаанд мэдээллийн технологийг нэвтрүүлэх үндэсний хөтөлбөр”-ийн
хүрээнд “Монгол киноны сан хөмрөгийг сэргээх, олон нийтэд түгээн
таниулах” төслийг Архивийн ерөнхий газар “Юнител” группийн “Юнивижн”
компанитай хамтран хэрэгжүүлэхээр болжээ. Тус компани нийгмийн
хариуцлагаа хэрэгжүүлж, хуучны хальснаас дуу болон дүрсийг сэргээж, HD
формат руу хөрвүүлэх төхөөрөмжийг Архивийн ерөнхий газарт хандивлаж, тус
төхөөрөмжийг ажиллуулах хоёр хүнийг ХБНГУ-д сургасан байна.
Төслийн
хүрээнд уран сайхны 182 кино, баримтат 873 киноны дуу болон дүрсийг HD
формат руу хөрвүүлэх бөгөөд эхний удаа “Мандухай сэцэн хатан” киног
сэргээхээр сонгожээ. Түүний дараа “Сэрэлт”, “Монгол хүү”, “Мөнх
тэнгэрийн хүчин дор”, “Тунгалаг тамир”, “Үер”, “Ацаг шүдний зөрөө”,
“Гэрлэж амжаагүй явна”, “Аман хуур”, “Алтан өргөө”, “Хүний мөр”,
“Бушхүүгийн үлгэр” зэрэг алтан сан хөмрөгийн бүтээлүүд ээлжээ хүлээж
байна.
