Монгол Улсын Ерөнхийлөгчийн “Морин хуураа дээдлэн дэлгэрүүлэх тухай” зарлигийг хэрэгжүүлэх ажлын хүрээнд Морин хуурын олон улсын III наадам, симпозиумыг зохион байгуулах тов оны эхээр гарч, наадмын бэлтгэлийг хангаад байна. Монгол туургатны соёл, эрдэм шинжилгээний сан, Дэлхийн морин хуурын холбоо хамтран зохион байгуулж буй уг наадмын үйл ажиллагаа хуур урлаачдын үзэсгэлэнгээр өчигдөр эхэллээ.
Хуур урлаачдын үзэсгэлэнд “Эгшиглэн магнай” үйлдвэрийн мастер П.Байгалжав Олон улсын морин хуурын анхдугаар наадамд тэргүүн байр эзэлсэн хуур болон дунд хуур, үндсэн хуураа тавьсан бол “Ситтимо” компанийн Д.Түвшинтөр, Хөгжим урлагийн төвийн Б.Баярсайхан нарын арваад хуур урлаач мэргэжлийн өндөр түвшинд бүтээсэн, хийц болон дуугаралтаараа өрсөлдөхүйц морин хуураа дэлгэжээ. Тэднээс өндөр настан О.Жаамхайн урласан ясан хуур үзэгчдийн сонирхлыг татаж байлаа. Инженер мэргэжилтэй тэрбээр “Хуур урлаачдаас зөвлөгөө авч мастер хуурын стандартаар энэ хуурыг бүтээсэн.
Ясан хуур маань мэргэжлийн тоглоочдын шаардлагыг хангахгүй ч гэрийн жавар үргээх хэмжээнд ардын болон уртын дууны аялгууг тоглох боломжтой” гэв. О.Жаамхай гуай уг ясан хуурыг 11 сарын хугацаанд урласан бөгөөд бүтээл нь өнгөрсөн жил ардын урлагийн их наадамд амжилттай оролцжээ. Тэрбээр үүнээс гадна металл хуур урласан аж. Морин хуур урлаачдын үзэсгэлэн гийн нээлтийн дараа “Хууртай үдэш” тоглолт боллоо. Энэхүү олон улсын наадам өнөө- дөр гадаадын морин хуурчдын тоглолтоор үргэлжилнэ. Уг арга хэмжээнд оролцохоор Япон, ОХУ, БНХАУ, АНУ, БНСУ, Герман, Францын 200 гаруй морин хуур суралцагч, сонирхогч, эрдэмтэн судлаачид Монголд ирээд байгаа юм.
