Монголын эрэгтэй боксчид ноднингийн ДАШТ-ээс олимпийн хоёр эрх авсан. Тэгвэл Казахстанд болсон эрхийн сүүлийн тэмцээнээс дахин хоёр боксчин Лондонд өрсөлдөх болзлоо хангалаа. 52 кг-д өрсөлдсөн гавьяат тамирчин Н.Төгсцогт Азийн наадам болон тивийн аваргын алтан медальтнуудыг дараалан ялж, шилдэг наймд үлдсэн талаар бид мэдээлсэн. Тэгвэл манай боксчин дараагийн даваанд Пакистаны М.Васемийг 22:9-өөр хожиж, хүрэл медалийн болзол хангаснаар Лондоны олимпод оролцох эрхээ авсан юм.

Гэхдээ Төгсцогт медаль авсан гээд тайвширсангүй, өчигдөр Японы Кацүаки Сүсаг 14:6-гаар (4:2, 5:3, 5:1) буулган авч, аваргын төлөө өрсөлдөхөөр боллоо. Тэрбээр өнөөдөр Казахстаны И.Сулейменовтой алтан медаль булаалдана. Түүний өрсөлдөгч нь өнгөрсөн жил БНСУ-ын Инчён хотноо болсон тивийн АШТ-ээс мөнгөн медаль хүртсэн амжилтттай.

“Бээжин-2008”-ын эрхээс атгаад алдсан ОУХМ Б.Түвшинбат Лондоны олимпийн өмнө алдаагаа залруулж, Монголын багийн 14 дэх эрхийг авчирлаа. Жин өгсөн 69 кг-д тулалдсан тэрбээр Пакистаны М.Аббасыг ялж, хүрэл медалийн болзол хангасан бол өчигдөр БНСУ-ын Ким Жүн-Воныг 29:17-гоор (12:6, 5:6, 12:5) хожиж, финалд шалгарснаар Лондонг зорих эрхтэй болжээ. Түүний өрсөлдөгч нь 2007 онд Улаанбаатар хотноо болсон Азийн АШТ-ий 60 кг-д хүрэл медаль хүртэж байв. Тэрбээр өнөөдөр алтан медалийн төлөө Хятадын тамирчинтай өрсөлдөнө.