“Макс” группийн 20 жилийн ойн нэрэмжит “Макс трофи” буудлагын тэмцээн Техник спортын төвд хоёр дахь өдрөө үргэлжилж байна. Тэмцээнд 80 гаруй мэргэн буудагч арван дасгалд өрсөлдөж буйн дотор хөдөлмөрийн баатар, “Бээжин-2008”-ын мөнгөн медальт О.Гүндэгмаа, олимпийн хошой хүрэл медальт, Монгол Улсын гавьяат тамирчин, Германы харьяат Д.Мөнхбаяр тэргүүтэй шилдгүүд ч багтжээ. Нөгөөдөр өндөрлөх “Макс трофи-2012”-ын нэг онцлог нь багийн дүнгээр тэргүүлэгч аваргын цомыг мөнгөн шагналын хамт хүртэх аж. Дашрамд дурдахад тус групп Лондоны олимпод өндөр амжилт гаргасан тамирчдыг хоёр өрөө байраар урамшуулахаа амалсан билээ.