“Лондон-2012” олимпийн эрх олгох буудлага спортын сүүлчийн тэмцээн Катарын Доха хотноо үргэлжилж байна. Хийн буу болон калибрт эхний хоёр байр эзэлсэн мэргэн буудагч зуны XXX олимпод онч сорих болзолтой. Азийн аварга шалгаруулах XII тэмцээний хийн урт бууны 10 м-т өрсөлдсөн 51 мэргэн буудагчаас ОУХМ Нянтайн Баяраа 695,8 оноогоор долдугаар байр эзэлж, Будант Альбионыг зорих визийг нэмлээ. Түүний өмнө орсон тамирчид Лондоны олимпийн болзлыг биелүүлсэн байсан тул уг эрх манай залууд огшжээ. Ийнхүү урт бууч маань эрэгтэйчүүдээс олимпийн эрх хүртсэн анхны монгол тамирчин болсноос гадна ах нарынхаа хамт багийн хүрэл медалийг зүүв.

Галаар наадаад зургаан жилийн нүүр үзэж буй тэрбээр “Шеньжень-2011” Универсиадын мөнгөн медальт, залуучуудын улсын дээд амжилтыг гурвантаа шинэчилсэн нэгэн. ОУХМ С.Адилбишийн удирдлагад бэлтгэл хийдэг, 2009 оноос ҮШБ-т багтсан бөгөөд өнгөрсөн жил Дэлхийн цомын гурван цуврал тэмцээнд онч сорьсон билээ.

Дашрамд дурдахад бүсгүйчүүд маань хийн гар бууны 10 м-т өнөөдөр, спорт гар бууны 25 м-т пүрэв гаригт (I.19) тус тус шалгалтаа өгнө.

Эрэгтэй

Хийн урт бууны 10 м: 1.Абхинав Биндра (Энэтхэг) 701,1 (597+104,1) 2.Жү Чинань (БНХАУ) 700,8 (598+102,8) 3.Ван Тао (БНХАУ) 699,9 (598+101,9) …7.Нянтайн Баяраа (Монгол) 695,8 (593+102,8) …10.Болдбаатарын Бишрэл (Монгол) 592 …20.Олзодын Энхсайхан (Монгол) 588

Гар бууны 50 м: 1.Жинь Жон О (БНСУ) 668 (573+95) 2.Жан Тиань (БНХАУ) 662,8 (568+94,8) 3.Ү Сяо (БНХАУ) 662,4 (569+93,4) ...29.Энхтайваны Даваахүү (Монгол) 544 … 3 2 . В а ш и л ы н Ганцоож (Монгол) 542

Эмэгтэй