Энэ онд хөдөлмөр бүтээлээрээ хошуучлан амжилт гаргасан салбар бүрийн хөдөлмөрийн аваргууд өчигдөр тодорлоо. Нийслэлийн Засаг дарга бөгөөд Улаанбаатар хотын захирагч, нийслэлийн Үйлдвэрчний эвлэлүүдийн холбоо, Нийслэлийн хөдөлмөрийн газар, Монголын ажил олгогч эздийн нэгдсэн холбооноос эрхэлсэн ажлаа үр бүтээлтэй гүйцэтгэж буй 16 хүнийг “Нийслэлийн хөдөлмөрийн аварга”-аар тодрууллаа.
Бусдыгаа уриалан идэвх санаачилгатай ажиллаж, амжилтаар буухиалагсдад Нийслэлийн Авто замын газрын дарга Д.Од, УКТЭийн мэс заслын эмч Л.Амгалан, “Эрдмийн өргөө” цогцолбор сургуулийн багш З.Байгальмаа, Онцгой байдлын газрын Шуурхай бүлэг 105-ын жолооч-холбоочин П.Отгонбаатар, NTV телевизийн шуурхай мэдээний албаны сурвалжлагч Н.БатОсор нарын хүн багтлаа. Нийслэлийн Авто замын газрын дарга Д.Од “Энэ жил амжилттай сайн ажиллахад олон хүний хүч хөдөлмөр шингэсэн. Ялангуяа автозам засварлах ажлаа цаг хугацаанд нь дуусгахад тусалсан иргэддээ баярлалаа” гэсэн юм.
Харин “Хөдөлмөр эрхлэлтийг дэмжих жил”-ийн хүрээнд санаачилгатай ажиллаж, олон хүнийг ажлын байраар ханган, тогтвортой амьдрал бэлэглэж чадсан хувь хүн болон Нийслэлийн Засаг даргын дэргэдэх газар, хэлтэс, дүүрэг, хороо, аж ахуйн нэгж, байгууллага, хувь хүмүүсийг шагнав. Нийслэлийн Хөдөлмөрийн газрын хүндэт өргөмжлөлийг НЗДТГын Хяналт шинжилгээ, үнэлгээний хэлтсийн мэргэжилтэн О.Тунгалаг, Хөгжлийн хэлтсийн мэргэжилтэн М.Намсрайхүү, Хэвлэл мэдээллийн албаны мэргэжилтэн Б.Пүрэвсүрэн, Хөдөө аж ахуйн газрын мэргэжилтэн Н.Төмөртулга нар гардлаа.
Мөн сурлага, урлагаараа бусдыг манлайлсан “Улаанбаатар” дээд сургуулийн оюутан М.Даариймаа, ШУТИС-ийн оюутан Ц.Оюундарь, Утга зохиол нийгмийн ухааны дээд сургуулийн оюутан Р.Цогтжаргал, ХААИС-ийн оюутан Ө.Анхбаяр, “Орхон” дээд сургуулийн оюутан Ш.Гантуяа, Цагдаагийн академийн оюутан А.Амартүвшин, ЭМШУИС-ийн оюутан Б.Чанцалдулам, МУБИС-ийн Д.Долгорсүрэн, СУИС-ийн Э.Лхагважаргал нарт Нийслэлийн Засаг даргын нэрэмжит тэтгэмж олгов. Дүүрэг бүрээс шалгарсан эдгээр оюутны ихэнх нь нэгдүгээр дамжаанд суралцдаг аж.
