Замын хөдөлгөөний дүрэм зөрчин, камерт бичигдэж үлдсэн жолооч нарт ЗЦГ, Замын хөдөлгөөний удирдлагын төв хамтран хариуцлага тооцож байна. Тус төвийн ажилтнууд камерын бичлэг шүүж, зөрчил гаргасан жолооч нарыг илрүүлэн, гэрийнх нь хаягаар торгуулийн хуудас илгээдэг болохоор төлөвлөж буй аж. Энэ талаар ЗЦГын Олон нийттэй харилцах хэлтсийн ажилтан Х.Сүрэнжав “Үүнийг хэрэгжүүлэхээр ярьж буй ч ажил хэрэг болгох арай болоогүй. Учир нь манай алба хаагчид цөөн, зав зай хомс тул тэр бүх жолооч нарын гэрийн хаягаар торгуулийн хуудас хүргэж өгөх гээд постоо хаяад явах боломжгүй. Харин зөрчил гаргасан жолооч нартай газар дээр нь хариуцлага тооцон, камерт удаа дараа бичигдсэн автомашины жолоочид торгох, жолоо барих эрхийг нь зургаан сараас хоёр жил хүртэлх хугацаагаар хасах арга хэмжээ авч байна.

Өнгөрсөн долоо хоногт гэхэд автобусны гурван жолооч, нэг суудлын тэрэгний жолоочийн эрхийг хаслаа. Долоо хоногт есөн удаа зөрчил гаргаж, камерт бичигдсэн жолооч ч байв. Дүрмээр яваа жолоочид дүрэм зөрчсөн нь хамгийн их гай тарьж, хүндрэл учруулдаг. Манайх замын цагдаа нарынхаа энгийн машинд ч хяналтын камер суурилуулж эхэлсэн. Ингэснээр цагдаагүй газарт дураараа аашлан, цагдаа харагдмагц номын царайлдаг жолооч нарыг илчлэх болно” гэж ярив.