“Сүлд” чуулгын гоцлол дуучин, цагдаагийн дэслэгч Г.Ариунбаатар Москва хотод болсон М.И.Глинкийн нэрэмжит олон улсын уралдааны тэргүүн байр эзэлсэн билээ. Цагдаагийн ерөнхий газрын дарга, хошууч генерал Д.СандагОчир Г.Ариунбаатар, түүний багш, гавьяат жүжигчин О.Ичинхорлоо, соёлын тэргүүний ажилтан Ц.Уртнасан нарыг өчигдөр хүлээн авч уулзан баяр хүргэлээ.

Хошууч генерал Д.Сандаг-Очир “Олон улсын нэр хүндтэй уралдаанд амжилттай оролцож, Монгол Улсын сонгодог урлагийн хөгжлийг дэлхийн түвшинд харуулж, цагдаагийн байгууллагын нэр хүндийг өндөрт өргөсөн Г.Ариунбаатарт цагдаа, дотоодын цэргийн байгууллагын нийт бие бүрэлдэхүүний өмнөөс баяр хүргэж, цаашдын уран бүтээлд нь өндөр амжилт хүсэн ерөөе” гэв.