Нийслэлийн барилга, хот байгуулалтын газар “New image” клубтэй хамтран “Унадаг дугуйн шинэ зам” төслийг өчигдөр танилцууллаа.  Дээрх байгууллагууд Улаанбаатарт унадаг дугуйн зам бий болгохоор Монголын дугуйн холбоо, ЦЕГ-тай хамтран ажиллаж эхэлжээ.
Дэлхийд хамгийн анх унадаг дугуй үйлдвэрлэсэн “Колумбия” компани одоогоос 120 жилийн өмнө сурталчилгааны зурагт хуудсандаа “Унадаг дугуйг та дэлхийн хаана ч хором бүр харах болно” гэсэн нь биелэлээ олж, өдгөө дэлхийн олон оронд өдөр тутмын хэрэглээ болж чаджээ.
Монголын дугуйн холбооны тэргүүлэгч, “Аттила” дугуйн дэлгүүрийн захирал З.Наран “Монголчууд 100 гаруй жилийн өмнөөс унадаг дугуйг хэрэглээндээ нэвтрүүлсэн. Гэсэн  ч хурдацтай хөгжлийн улмаас сөрөг үр дагавар гарсны нэг нь автомашины нягтшил ихсэж, агаарын бохирдол, шатахууны үнийн хяналтгүй өсөлт зэрэг олон сөрөг хүчин зүйлийг үүсгэсэн. Унадаг дугуйг иргэдийн хэрэглээнд нэвтрүүлэх нь цаг үеэ олсон ажил. Энэхүү ажлыг цогцоор нь хийхэд мэдээж багагүй  хугацаа шаардлагатай ч олны талархлыг хүлээж чадна” гэлээ. 
Төслийг хэрэгжүүлэхэд нэг тэрбум төгрөг шаардлагатай юм байна. Унадаг дугуйн зориулалтын 143 км зам, 99 зогсоол Улаанбаатарт байгуулна. Үүний зураг төслийг боловсруулахад 145 сая төгрөг зарцуулна. Уг мөнгийг ирэх оны төсөвт суулгахаар болсноо хотын удирдлагууд энэ үеэр хэлж байв.