“Инсбрук-2012” залуучуудын өвлийн анхдугаар олимпийн наадамд оролцох хоёр дахь эрхийг тэшүүрчин охин эх орондоо авчирлаа. 15 настай Алтантулгын Энх-Ариун Канад, Герман, Норвегид болсон цуврал тэмцээнд хурд сорьсоор Австри улс руу зорих эрхийн бичгээ өвөртөлжээ. Нийслэлийн I сургуулийн аравдугаар ангийн сурагч, өсвөр үеийнхний тэшүүрийн улсын аварга, рекордч А.Энх-Ариуныг гавьяат тамирчин Л.Цэнд, Г.Болд, Д.Энхбаяр нар дасгалжуулсан байна.

Ариунаа охин өмнө нь “олимп”- од оролцож байсан туршлагатай нэгэн бөгөөд 2010 онд БНСУ-д өндөрлөсөн дэлхийн математикийн олимпиадад тархиа сорьсон удаатай. Ийнхүү 2012 оны нэгдүгээр сарын 13-22-нд Австри улсын Тироль мужийн Инсбрук хотноо болох залуучуудын өвлийн олимпод Төв аймгийн цаначин хүү Д.Өсөхбаяр, тэшүүрчин охин А.Энх-Ариун нар эх орноо төлөөлөн оролцох боллоо.