Ирэх
онд зуны XXX олимп Английн Лондон хотноо болно. Их олимпоос өмнө
манайхан бас нэгэн наадамд оролцоно. Энэ нь Австрийн Инсбрук хотноо ирэх
нэгдүгээр сарын 13-22-нд болох залуучуудын өвлийн анхдугаар олимп.
Одоогоос 47 жилийн өмнө Монголын олимпчид анх цана, тэшүүрийн төрлөөр
өрсөлдөж байсан тэрхүү хотод залуучуудын олимп “хөшгөө нээх” юм. Эх
орныхоо тугийг олимпийн тэнгэрт анх мандуулсан Л.Цэнд гавьяатын мөрөөр
залуучууд маань замнана.
Цэнгэлийн манлай олимпийг зохион байгуулах хур туршлагатай тус хотод 1964 оны олимпийн дараа 1976 оны наадмын бамбар бадамласан түүхтэй. Өвлийн спортын тив, дэлхийн аварга шалгаруулах тэмцээнийг ч нүнжигтэй зохиож ирсэн туршлагадаа дулдуйдан австричууд залуучуудын анхдугаар олимпийг эх орондоо хүлээн авахаар болсон биз ээ. Монголчууд тус олимпод цаначид, тэшүүрчдээ сойхоор бэлтгэж байгаа юм. Залуучууд маань олимпийн эрх олгох тэмцээнүүдэд “шал галтаа өгч” эхэлсэн бөгөөд ОУОХ-ноос саяхан нэг цаначинд “виз” олгох шийдвэр гаргажээ.
Өсвөрийн тамирчид нарийн шалгуурын дүнд олимпийн эрх хүртэх бөгөөд өнгөрсөн хавар манай хоёр цаначин тусгай тэмцээнд болзол биелүүлж чадаагүй юм. Харин МҮОХ-ноос ОУОХ-нд хүсэлт гаргасны дагуу хөвгүүдэд нэг эрх олгох тухай албан ёсны хариу ирүүлснээр манай зандан хүлэгтний хос мөр Инсбрукт дурайх нь тодорхой боллоо. Харин тэшүүрчдийн хувьд I сургуулийн сурагч А.Энх-Ариун Канадын Калгари хотноо болсон тэшүүрийн залуучуудын Дэлхийн цомын тэмцээнд хурд сорьж, “босго оноо”-гоо аваад байна.
Тэрбээр 500 м-т 45,58, 1000 м-т 1.33,65, 1500 м-т 2.23,91, 3000 м-т 5.14,89 амжилт үзүүлсний зэрэгцээ дөрвөн зайд улсын дээд амжилтыг шинэчилсэн. Цаашид Герман, Норвегид зохиог дох олимпийн эрхийн төлөөх тэмцээн бүхнийг шийдэх бөгөөд дэлхийн шилдэг 28 тамирчны тоонд багтвал Инсбрукийн олимпийн эрх албан ёсоор авах учиртай. Түүний бэлтгэл хийх, тэмцээнд оролцох бүх зардлыг МҮОХ-ноос гаргасан байна. Калгарид уралдахаасаа өмнө А.Энх-Ариун БНХАУ-ын Чанчүнь хотноо хамтарсан бэлтгэл хийсэн нь үр дүнгээ өгсөн гэж дасгалжуулагч нь өгүүлсэн юм.
