Талархаж амьдрах гэдэг үнэхээр чухал үг шүү, энэ үгийг хэлэхээр хэн нэгэн нь бас л бурхан шашин гэж бүү бодоорой. Энэ үг хүний амьдралын ямар олон асуудлуудыг нуруундаа үүрч гардагийг мэддэггүй болоод л тэгж бодож байгаа хэрэг юм. Хүн ер нь хэн нэгэн хүнд баярлахаараа баярлалаа гэж хэлдэг. Энэ бол тэр хүний чин сэтгэлийн үг юм. Үүнтэй адилаар хүн болгон өөрийнхөө ажил мэргэжил, гэр бүл, ойр тойрныхондоо талархаж амьдрах юм бол энэ нь эерэг энергийг хүнд мэдрүүлж байдаг маш хүчтэй зэвсэг юм л даа.

Ингэснээрээ хүн өөртөө маш итгэлтэй болж өөрийнхөө үнэ цэнийг мэдэрч авдаг. Үнэ цэнээ мэдэрсэн хүн үргэлж урагшаа харан тэмүүлж амьдардаг бөгөөд түүнд арагшаа харах шаардлага байдаггүй. Ийнхүү та одоо байгаа амьдрал, ялалт амжилтандаа үргэлж талархаж тэр бүхнээ хайрлаж явах юм бол маш олон шийдэхэд бэрхшээлтэй байсан асуудлуудтайгаа нүүр тулахаас айлгүй, түүнийг даван гарах хүч чадлыг өөртөө хуримтлуулж чаддаг юм. Энэ бол нэгэн ёсны бидний ярьдагаар ухаан юм. Хүнд эргэцүүл гэж толгой заяасан гэж ярьдаг. Эрэгцүүлэхгүй юм бол хүн болж амьдарсаны хэрэг байхгүй шүү дээ.

Хүн болгонд ямар нэг асуудал тулгарч байна гэдэг чинь таньд түүнийг даван туулах хүч чадал байгаа учраас л таньд тийм зүйл тохиолдож байгаа хэрэг юм. Та түүнийг талархалтайгаар эерэг талаас нь харж чадах юм бол уул шиг том асуудал ч өчүүхэн цэг мэт болж өөрчлөгдөж болно. Хүнд урагшлах ганцхан зам заяагдсан байхад хойш нь татах мянган зам заяагдсан байдаг. Үнэндээ тэр олон шалтаг шалтгаанууд нь зүгээр л хоосон зүйлүүд юм. Энэ хорвоогийн бүх хүмүүст ямар нэг гэм гэж зүйл байхгүй бөгөөд бүх хүмүүс сайхан амьдрах ёстой. Буддын шинжлэх ухаанд ч гэсэн хүн хэрвээ зовж байвал энэ нь нүгэл юм гэсэн байдаг. Тиймээс үргэлж талархаж амьдрахгүй бол танаас зовлон хэзээ ч салахгүй. Эцэст нь хэлхэд талархал хүндэтгэл гэдэг нэгэн ойлголт юм шиг санагддаг. Хүндэлж байгаа учраас талархдаг, талархаж байгаа учраас хүндэлдэг. Амьдралдаа та талархалтай хандаж байна гэдэг нь та амьдралаа хүндэлж байна гэсэн үг юм. Амьдралаа хүндлэнэ гэдэг нь эргээд та өөрийнхөө хийж бүтээсэнийг хүндэлж байна гэсэн үг юм. Ингэхээр та өөрийгөө хүндэлж хайрладаг болчих юм бол энэ орчлонгийн бүх юманд талархаж чадна гэсэн үг юм.

Орчлон дээр өөрийгөө хүндэлж дээдэлж тахин шүтдэггүй мөртөө өөр хэн нэгнийг илүү хүндэлж хайрладаг хүмүүс их байдаг. Жишээлбэл фен гэдэг хүмүүс байна. Эдгээр хүмүүс нь хэн нэгнийг хүндэлж хайрлаж даган дуурайж шүтэн биширдэг мөртөө өөрийгөө түүн шиг хайрлаж шүтэн дээдэлж чаддагүй. Энэ орчлон дээр таньд ганцхан өмч болгон өгсөн зүйл чинь таны л бие шүү дээ. Та биеийнхээ хүчээр л хорвоо дээр танигдаж хүн гэгдэж яваа шүү дээ. Тиймээс тэрхүү цор ганц бие сэтгэлийг хүндлэн дээдлэхгүй юм бол та бусдын бие сэтгэлийг хүндэлж чадна гэжүү? Ингээд хүмүүсээ энэ хорвоо дээр ганцхан таных л болж заяагдсан гар хөл нүд ам чих гээд бүх эрхтэнээ сэтгэлтэйгээ хайрлая. Өөрийгөө хүндэлдэг хүн хэзээ ч гэмт үйлдэл хийдэггүй бөгөөд түүнд өөрийн гэсэн бусдыг үзэх үзэл үргэлж нуугдаж байдаг. Энэ бол хувь хүний гайхамшигтай ертөнц юм. Хувь хүн өөрийнхөө сэтгэлдээ өөрийнхөө ертөнцийг бүтээж чадаагүй байж бусдын сэтгэлийн ертөнцийг удирдана гэж байхгүй. Хэзээ ч барагдашгүй үргэлж ундарч байдаг тийм л гайхамшигтай зүрх сэтгэлийг та өөртөө бий болгож амьдарч чадах юм бол та заавал хүссэндээ хүрч ялалт амжилт гэдэг таны хормойноос зүүгдэн ар араасаа дугаарлан зогсох болно гэдэгт би итгэлтэй байна. Энэ хорвоогийн бүх л гэгээлэг ертөнцийн гэрэл гэгээн дор өөрийгөө бүтээж амьдарч явдаг сая сая хүмүүст үнэний эрэл тань цуцашгүй байх болтугай гэж ерөөе!

Орлоо.ком