УИХ-ын Хүнс хөдөө аж ахуй, байгаль орчны байнгын хороо, Олон улсын санхүүгийн корпорац (ОУСК)-иас хүнсний аюулгүй байдлын тухай хуулийн төсөл дээр хамтран ажиллах тухай гэрээг өчигдөр үзэглэв. Уг гэрээнд зааснаар хүнсний аюулгүй байдлын хяналтыг боловсронгуй болгож, бодлого зохицуулалтын олон улсын стандартыг нэвтрүүлэх аж. Энэ үеэр ОУСК-ийн дэд ерөнхийлөгч Дороти Берри ”Бид Монголд хүнсний аюулгүй байдлыг хангах чиглэлээр хоёр жи лийн өмнөөс хамтран ажиллаж эхэлсэн.

ОУСК зөвхөн хөгжиж байгаа бус хөгжингүй орнуудад ч энэ чиглэлээр үйл ажиллагаа явуулдаг. Иргэдийн эрүүл мэндэд учирч болзошгүй эрсдэлийг бууруулж, байгууллагын дотоод хяналтыг олон улсын төвшинд хүргэхэд тусалснаар Монголын эдийн засгийн урт хугацааны өсөлтөд дэмжлэг болно гэж бид үзэж байгаа” гэв. Шинээр батлан гаргах гэрээ нь хүнснээс үүдэх өвчл өлийг багасгах, хөдөө аж ахуйн салбарын экспортын хэмжээг нэмэгдүүлэхэд чухал нөлөөтэй байх аж. Мөн энэ үеэр шинэчилсэн хуулийг хэрэгжүүлэхэд ОУСК, Мэргэжлийн хяналтын ерөнхий газар хамтран ажиллах санамж бичгийг үзэглэлээ.

Тус байгууллага нь Европын орнуудын хүнсний аюулгүй байдлын эрх зүйн орчныг шинэчлэхэд ихээхэн туршлага хуримтлуулсан бөгөөд тухайн орны онцлог, эдийн засгийн хөгжлийг харгалзан үзсэний үндсэн дээр хуулийн төсөл боловсруулан, санал болгодог байна. Тэдний тусламжтай гаар 2006 онд Босни, 2008 онд Гүрж зэрэг орон хүнсний аюулгүй байдлын тухай хуулиа шинэчилж байжээ.

Ц.БОЛОРМАА