Улсын
драмын эрдмийн театрын урдаа барьдаг цөөн жүжигчний нэг нь
Г.Эрдэнэбилэг. Сүүлийн үед тэр бүр ч тодорч буй. Театрын тайзнаа амилах
“Тэнгэрийн хүү” жүжгийн Модун Шанью, “Кино код” төслөөс хийх “Ганган
Төгс” уран сайхны киноны гол дүр гээд тэрбээр томоохон гэж хэлж болох
бүх л бүтээлийг өөрийн болгож байгаа нь гайхалтай. Авьяастай, чадалтай
бол тайз, дэлгэцийн аль ч төрөлд эн тэнцүүхэн амжилт гаргаж болдгийн
жишээ энэ. Тэр ч бүү хэл Г.Эрдэнэбилэг “Драм дөрөв” хамтлагийн гишүүн,
эвлэгхэн хоолойтой дуучин.
Оюутан залууст зориулсан “Дэвжээ” цэнгээнт нэвтрүүлгийг хөтөлдөг байхаасаа олны танил болж, сургуулиа төгсөөд театрын жүжигчин болсон түүхтэй. Тэрбээр театрын тайзнаа У.Шекспирийн “Ромео, Жульетта” жүжгийн Меркуцио, С.Жаргалсайханы “Шөнө дундын бүжиг” жүжгийн Дудраа, Б.Батрэгзэдмаагийн “Тайчигч хөвгүүд басаарал гудамж” жүжгийн Мөрөн, Д.Равжаагийн “Саран хөхөө” жүжгийн Номунбаясгалан зэрэг дүр бүтээж байжээ.
Г.Эрдэнэбилэг нэгэн ярилцлагадаа “Би уг нь Дүрслэх урлагийн дээд сургуульд орох бодолтой байсан юм. Гэтэл зургийн ангийн элсэлтийн шалгалт болохын өмнө СУИС-ийн кино драмын ангийн шалгалт товлогдсон байсан. Юу ч гэсэн өгөөд үзье гэж бодоод шалгуултал тэнцчихсэн. Тэгээд л жүжигчин болсон доо” гэж ярьсан. Санамсаргүй тохиолдлоор амьдралынхаа мэргэжлийг сонгосон авьяаслаг жүжигчний талаарх шинэ мэдээ, мэдээллийг www.drama.mn хаягаас уншиж болно.
