Чөлөөт бөхийн үндэсний шигшээ багийн эмэгтэй тамирчид Туркийн Истанбул хотноо болсон дэлхийн аварга шалгаруулах тэмцээнээс хоёр мөнгө, нэг хүрэл медаль авч, багаараа гуравдугаар байрт шалгарсан сайхан амжилттай эх орондоо ирлээ. Олимпод ордог спортын төрөлд анх удаа хүрэл цом авч буй нь Монголын спортын түүхэнд алтан үсгээр бичигдэх амжилт юм. Энэ амжилтын эзэд нь мөнгөн медаль хүртсэн ОУХМ Б.Оюунсүрэн, ОУХМ Д.Отгонцэцэг, хүрэл медаль хүртсэн ОУХМ О.Насанбурмаа болон тэдний багш дасгалжуулагчид юм.

Манай чөлөөт бөхийн шигшээ багийн эмэгтэй тамирчид 2007 оноос хойш тив, дэлхийн томоохон тэмцээнүүдээс тогтмол медаль авчирч байгаа билээ. ДАШТ-д амжилттай оролцсон тамирчид болон багийн ахлагч хөдөлмөрийн баатар Х.Баянмөнх, үндэсний шигшээ багийн ахлах дасгалжуулагч, гавьяат дасгалжуулагч А.Цэдэнсодном, МЧБХ-ны ерөнхий нарийн бичгийн дарга Г.Бат-Эрдэнэ, гавьяат дасгалжуулагч, олимпийн зэрэглэлийн шүүгч А.Басхүү нар өчигдөр хэвлэлийнхэнтэй уулзаж, амжилт ололт, алдаа дутагдлаа тайлагналаа.

Энэ жилийн ДАШТ-д өмнөх жил үүдээс хамгийн олон буюу 104 орны 900-гаад тамирчин зодоглосноороо онцлог бөгөөд “Лондон-2012” олимпийн их сунгаа гэж болох юм. Тэмцээнд ирсэн тамирчдын дийлэнх нь ирэх жилийн олимпод оролцох учраас тамирчдад өрсөлдөгчөө судлах том боломж олгосныг тэд онцолж байв. ДАШТ-д явсан багийнхан тогоон дотроо халуухан шүүмжлэл өрнүүлсэн юм. Багийн дарга Х.Баянмөнх “37 жилийн өмнө манайхан Туркийн Ис тан булд болсон ДАШТ-ээс алт, мөнгө, хүрэл медальтай ирж бай сан. Энэ удаа тэр түүх давтагдах байх гэж бэлгэшээн ярьж байсан.

Эмэгтэйчүүд маань сайхан амжилт гаргаж тэр түүхийг давтах дөхлөө. Нэг мөнгөн медаль нь алт байх боломжтой байсан. Харин тамирчид, дасгалжуулагч нар шинэ дүрмээ сайн судлаагүйгээс шийдвэрлэх мөчид оноо алдаж, алтан медальгүй ирлээ. Шинэ дүрмийн талаар шүүгчид сургалт явуулж, мэдээлэл өгч баймаар байна. Эрэгтэй багийн хувьд барилдааны ур техник, өрсөлдөх чадвар сул, дэлхийн дэвжээнд өрсөлдөх хэмжээнд хүрээгүй байгаа нь харагдлаа” гэхэд А.Басхүү шүүгч “Энэ дүрэм гараад долоон жил болж байна. 2005 онд дүрэм шинэчлэгдэхэд “Монголчуудад таарсан сайхан дүрэм гарлаа” гэж ярьцгааж байсан. Бид Дэлхийн чөлөөт бөхийн холбоотой олон удаа хэлцэл хийж, нэлээд лообийдож байж энэ дүрмийг батлуулсан. Шинэ дүрэм гарснаас хойш улсын хэмжээнд хэд хэдэн удаа семинар зохион байгуулсан. Бөгсөөрөө суусан тохиолдолд оноо алдана гэдгийг багш дасгалжуулагч, тамирчид бүгд мэдэж байгаа шүү дээ.

Тамирчид, дасгалжуулагчид уг нь өдийд судалчихсан байх ёстой. Алдааг дахин давтахгүй байхыг хичээх ёстой. Алдаагаа хаацайлах бус дүгнэлт хийх хэрэгтэй. Тэгвэл дахин алдахгүй. Хаана шүүмжлэл байна тэнд ажил буцалж, урагшилж байдаг” гэв. Амжилт гаргасан тамирчдадаа баяр хүргэхийн зэрэгцээ алдаа дутагдлаа ч нуулгүй ярилцсан уг арга хэмжээний үеэр ДАШТ-ий мөнгөн медальтнуудтай уулзлаа.

Д.ОТГОНЦЭЦЭГ:

-ДАШТ-ээс мөнгөн медаль хүртсэнд баяр хүргэе. Чөлөөт бөхөөр хэдэн жил хичээллэж байж энэ амжилтад хүрэв?

-Баярлалаа. Маш их баяртай байна. Аав маань намайг бөхийн спортод оруулсан. Чөлөөт бөхөөр долоон жил хичээллэж байна. Үндэсний биеийн тамирын дээд сургуулийн дөрөвдүгээр курст сурдаг.

-Алтан медалийн оосроос атгаад алдсан нь дүрмээ мэдэхгүйгээс болсон юм уу?

-Аваргын төлөө барилдаж, гуравдугаар үедээ шодолт хийхэд өрсөлдөгчид маань давуу тал бий болсон. Би сууж шидээд оноо авчихлаа гэж бодтол алдчихсан. Ийм л юм болсон. Өмнө нь бөгсөөрөө суухад оноо өгдөггүй байсан. Он гарснаас хойш ийм шийдвэр гарсан гэж байгаа. Багш дасгалжуулагч нар ч, бид ч ерөөсөө мэдээгүй. Он гарснаас хойш болсон томоохон тэмцээнүүдийг үзэж байхад бөгсөөрөө суухад оноо өгөхгүй байсан. Саяын тэмцээнд миний барилдаанаас хойш надтай адил барилдаан гарахад оноо өгөхгүй л байсан.

Б.ОЮУНСҮРЭН:

-Дэлхийн аваргын тэмцээнд анх оролцоод мөнгөн медаль авсанд тань баяр хүргэе.

-Энэ бол миний анхны том тэмцээн байсан. Дэлхийн аваргын тэмцээн үзэгч олонтой, шуугиан ихтэй, аргаг үй сүртэй байдаг юм байна. Тив, дэлхийн аваргууд цугларсан болохоор өрсөлдөөн их байсан. Медаль аваад зогсож байхад их л сайхан байлаа. Их сандарсан. Сэтгэл их хөдөлдөг юм билээ.

-Өмнө нь ямар амжилт гаргаж байв?

-Чөлөөт бөхөөр 2006 оноос хичээллэж байна. Оюутны дэлхийн аваргаас хүрэл, Азийн аваргаас мөнгөн медаль хүртсэн.

-Бөхийн спорт хэцүү санагдах үе гарч байв уу?