Орон байрны нөхцөлөө сайжруулах хүсэлтэй өрхийн эмч, эмнэлгийн ажилтнууд 100000 айлын орон сууц хөтөлбөрт хамрагдах боломж нээгдлээ. Нийслэлийн Засаг даргын санаачилгаар “Эрүүл мэндийн анхан шатны тусламж үйлчилгээний чанар хүртээмжийг нэмэгдүүлье” зөвлөлгөөнийг өчигдөр Соёлын төв өргөөнд зохион байгуулсан. Энэ үеэр нийслэлийн Эрүүл мэндийн газар, Монголын өрхийн эмнэлгүүдийн холбоо, Орон сууцны санхүүжилтийн корпораци хамтран гурвалсан гэрээ байгуулснаа зарласан юм. Эхний ээлжинд нийслэлийн Засаг даргаас олгосон квотоор найман хувийн хүүтэй зээлд хамрагдах боломжтой. Харин ирэх сарын эхээр орон сууцны зээлийн санхүүжилтийн эх үүсвэрийг Үндэсний хороогоор баталснаар зургаан хувийн хүүтэй, 25 жилийн хугацаатай зээл олгоно гэдгийг ОССКийн захирал Ж.Алдаржавхлан тэдэнд дуулгав.

Өрхийн эмнэлэгт ажиллаж буй эмч, эмнэлгийн ажилтнуудын нийгмийн асуудлыг шийдвэрлэх эхний алхам болсон эл зөвлөлгөөнд нийслэлийн удирдлагуудаас гадна нийслэлд үйл ажиллагаа явуулдаг өрхийн эмнэлгүүдийн төлөөлөл оролцсон. Нийслэлд 124 өрхийн эмнэлэгт 521 их эмч, 475 сувилагч ажилладаг юм байна. Ажлын байнгын ачаалалтай байдаг, цалин бага, төрийн албан хаагч бус, бүрэн бус нөхөрлөлд харьяалагддаг болохоор эмч сувилагч нар нь мэдлэг мэргэжлээ дээшлүүлэх, хөнгөлөлттэй зээл тусламжид хамрагдах боломж байдаггүй зэрэг өрхийн эмнэлгийнхний хувьд бэрхшээлтэй асуудал их аж. “Сүүлийн гурван жилд Улаанбаатар хотод шилжин ирэгсдийн тоо 100 мянга даваад байна.

Хүн ам өсөж буй ч тэдэнд эрүүл мэндийн үйлчилгээ үзүүлж буй өрхийн эмнэлэг, эмч сувилагч нарын тоо яг хэвэндээ. Улаанбаатар хотын Захирагч та бүхэнтэй уулзаж, санал бодлоо хуваалцаж буйн шууд зорилго нь удахгүй нийслэл хот төсвөө хэлэлцэнэ. Энэ үеэр та бүхний гаргасан санал санаачилгыг төсөвт суулгаж, санхүүжилтийн нэмэлт дэмжлэг олгох явдал юм. Түүнчлэн өрхийн эмнэлэгт ажиллаж буй хүмүүсээ орон байртай болгож, нийгмийн асуудлыг шийдэж өгөх нь чухал. Цаашлаад эмнэлгийн тоног төхөөрөмжийг ч сайжруулах шаардлага бий. Анагаахын их сургуульд эмч мэргэжлээр сурч байгаа оюутан залуус нарийн мэргэжил эзэмших хүртлээ ажилгүй байдаг. Тэгвэл ирээдүйн эмч нарын сургуулиа төгсөөд ажиллах шууд ажлын байр бол өрхийн эмнэлэг юм. Энэ бүгдийг хэрэгжүүлэхийн өмнө та бүхний санал бодлыг сонсож байна” гэж зөвлөлгөөний үеэр хотын дарга Г.Мөнхбаяр хэллээ.

Энэ үеэр Баянгол дүүргийн VII хорооны “Эрхэм жаргалан” өрхийн эмнэлгийн их эмч Д.Мөнхцэцэгээс зарим асуултад хариу авлаа.

-Өрхийн эмнэлгүүдэд тулгамдсан ямар асуудал байна вэ?

-Хүн ам ихэссэнтэй холбоотойгоор манай өрхийн эмнэлгийн ачаалал маш их. Нэг эмч 1500-1800 хүнд үйлчлэх ч манай нэг эмчид 3000 хүн ногдож байна. Хүн ам шигүү суурьшсан, өвчлөл ч их байна. Бид амсхийх завгүй ажилладаг. Манай эмнэлэгт эмч дутагдалтай. Саяхан хоёр ч эмч маань гарчихлаа. Цалин хангамж сайн биш учраас төгсөж ирсэн эмч нар сайндаа л хоёр жил болоод явчихдаг. Өмнө нь манайх 7000 хүн амд таван эмчтэй ажилладаг байсан бол одоо 12000 хүнд гуравхан эмч арай ядан үйлчилж байна. Гэтэл зайлшгүй гэрээр очиж үзэх шаардлагатай хүн өвчтөнүүд, нярай хүүхдүүдээ эргэж чаддаггүй.

-Та хэдэн төгрөгийн цалин авдаг вэ?