Монгол Улсын Ерөнхийлөгчийн нэрэмжит “Чингис хаан” дэлхийн цомын тэмцээн өнгөрсөн амралтын өдрүүдэд болж, 22 улсын 171 жүдоч “Лондон-2012” олимпийн 100 онооны төлөө өрсөлдлөө. Гурав дахь жилдээ зохиогдсон тэмцээний хүрээ жилээс жилд өргөжиж, гран пригийн төвшинд хүрэх боломжтойг Жүдо бөхийн холбооны ерөнхийлөгч, УИХ-ын гишүүн, Зам, тээвэр, барилга хот байгуулалтын сайд Х.Баттулга нээлтийн үеэр онцолсон юм.

Францын Парис хотноо болсон ДАШТ-д тааруу оролцсон Монголын шигшээ багийнхан нутгийнхаа дэвжээнд ааглаж, ард түмнээ тайвшруулах зорилгоо биелүүлэв. ДАШТ-ий дараахан зохиогдсон нь хилийн чанадаас ирэх тамирчдын тоонд нөлөөлсөн байж болох талтай ч БНСУ-ын нэгдүгээр шигшээ баг, Япон, БНХАУ-ын ур чадвар өндөртэй тамирчид ирсэн байлаа.

Эрэгтэйчүүдийн 66 кг-ын жинд Парисын татамид Х.Цагаанбаатарыг буулгаж авсан Чо Жун Хо С.Мияарагчаад ялагдсан бөгөөд тэрбээр цаашид нутаг нэгт Ан Жон Хваныг ялснаар хүрэл медаль хүртсэн юм. Харин Х.Цагаанбаатар нутгийн дэвжээндээ өнгөтэй байж ээлжит алтан медаль хүртсэнийхээ дараа “Монголын жүдочид 2012 оны олимпод заавал аваргална” хэмээн амласныг тэмдэглэх нь зүйтэй.

Цагийн зөрүү ихтэй, уур амьсгал, газар нутаг тэс өөр Лондонд өмнөх амжилтаа бататгана гэдэгт Цагаанаа ба түүний нөхөд итгэлтэй байгаа аж. Энэ бол хийсвэр сэтгэлийн хөөрөл биш, биелэх ёстой амлалт хэмээн ард түмэн хүлээж авсан нь лавтай.

ЭРЭГТЭЙ

60 КГ: 1.Ч.Болдбаатар (Монгол) 2.А.Телманов (Казахстан) 3.Д.Төмөрхүлэг (Монгол), Ким Вон Жинь (БНСУ)

66 КГ: 1.Х.Цагаанбаатар (Монгол) 2.С.Мияарагчаа (Монгол) 3.Чо Жунь Хо (БНСУ), М.Фукуока (Япон)

73 КГ: 1.С.Ням-Очир (Монгол) 2.Г.Одбаяр (Монгол) 3.Г.Пүрэвдорж (Монгол), И.Лефанов (Украин)

81 КГ: 1.Хон Сук Вон (БНСУ) 2.О.Ууганбаатар (Монгол) 3.А.Седеж (Словен), И.Воробев (ОХУ)

90 КГ: 1.Сон Дай Нам (БНСУ) 2.К.Вопросов (ОХУ) 3.Р.Гонтиюк (Украин), Квон Ён Во (БНСУ)

-100 КГ: 1.Б.Тэмүүлэн (Монгол) 2.Б.Ариун-Эрдэнэ (Монгол) 3.Б.Өнөржаргал (Монгол), Д.Пүрэвдорж

100 КГ: 1.Ким Сун Минь (БНСУ) 2.А.Волков (ОХУ) 3.Н.Батсуурь (Монгол), Р.Шичинохе (Япон)

ЭМЭГТЭЙ

48 КГ: 1.М.Уранцэцэг (Монгол) 2.Шинь Сюн Минь (БНСУ) 3.Г.Отгонцэцэг (Монгол),Мо Чинкюнь (БНХАУ)

52 КГ: 1.М.Бундмаа (Монгол) 2.Ким Кюнь Ok (БНСУ) 3.Б.Солонго (Монгол), Зузанна Павликовска (Польш)

57 КГ: 1.Ким Жань Ди (БНСУ) 2.Т.Баттөгс (Монгол) 3.Д.Сумъяа (Монгол), Лию Ян (БНХАУ)

63 КГ: 1.Ц.Мөнхзаяа (Монгол) 2.Кон Жа Ён (БНСУ) 3.О.Диденко (Украин), Ж.Гарсиа (Пуэрто Рико)

70 КГ: 1.Р.Срака (Словен) 2.Н.Смал (Украин) 3.Хан Вэйянь (БНХАУ), Ф.Сзаво (Унгар)

-78 КГ: 1.П.Лхамдэгд (Монгол) 2.В.Туркс (Укриан) 3.Жеон Геон Ми (БНСУ), Д.Погорзелец (Польш)