Бичлэгийн тоо 3,329
Монголын
иргэний хөдөлгөөнүүдийн төлөөлөл, “Говь нутгаа хамгаалах хөдөлгөөн”,
“Даяар Монгол” хөдөлгөөнийхөн өчигдөр мэдээлэл хийлээ. “Гадаадын өндөр
хөгжилтэй улс оронд ашигт малтмалын орд газруудыг зарж борлуулахад
зөвхөн тухайн Засгийн газар зөвшөөрөл олгодог. Гэтэл манай улсад
эсрэгээрээ байна. Гадаад, дотоодын цөөн иргэн, аж ахуйн нэгжүүд бидний
газар нутгийг дур зоргоороо зарж, арилжаа наймааны хэрэгсэл болгож
байгаа нь Монгол Улсын тусгаар тогтнол, үндэсний аюулгүй байдалд сөргөөр
нөлөөлж байгаа.
Монголын нүүрсний тогтоогдсон нийт нөөцийн 30 орчим хувь, зэсийн 70 гаруй хувийг Канадын иргэн Роберт Фрийдланд болон түүний компани эзэмшиж байна. Тэрбээр газрын хэвлийн баялаг ордуудыг ашиглан 40 гаруй тэрбум ам.доллар босгосон баримт бий. Гэтэл Монгол Улсад нэг ч төгрөгийн татвар төлөөгүй, дорвитой хөрөнгө оруулалт, бүтээн байгуулалт хийлгүй өнөөдрийг хүрлээ. Үндэсний аюулгүй байдалд нөлөөлөхүйц үйл явцыг онцгой анхаарахыг хүсье” гэж Монголын иргэний хөдөлгөөнүүдийн төлөөлөн удирдах зөвлөлийн гишүүн Ц.Хосбаяр ярив.
“Financial times” сонины энэ оны долдугаар сарын 12-ны дугаарт Монголын газар нутгийн 100:1 буюу гурван сумын нутгийг эзэмшдэг Роберт Фрийдланд нүүрс, зэсийн томоохон ордуудаа Хятадын компаниудад зарахаар хэлэлцээр хийж эхэлсэн тухай мэдээлэл гарсныг тэд онцолж байлаа. Мөн 2008 оны арванхоёрдугаар сарын 28-нд Өмнөговь аймгийн 16 суманд хайгуул хийх 23 зөвшөөрөл олгосон нь эрх мэдэлтнүүд газар нутгаа худалдсан байх магадлалтай гэж сэжиглэж байгаагаа тэд хэлээд АТГ-т шалгуулах болно гэв.
