Ерөнхий боловсролын стандарт, хөтөлбөрийг олон улсад хүлээн зөвшөөрөгдсөн Кэмбрижийн хөтөлбөртэй нийцүүлэн шинэчлэх ажил өнгөрсөн оноос эхэлсэн. Иймээс өнгөрсөн хичээлийн жилд тус хөтөлбөрөөр хичээллэх хос хэлний төрийн өмчийн анхны “Шинэ эрин” сургуулийг Улаанбаатар хотод байгуулсан юм. Хөтөлбөрийн хүрээнд хос хэлээр хичээллэдэг 30 сургуулийг барихаар төлөвлөөд байгаа юм байна.

Энэ жил “Шинэ эхлэл”, “Монгол тэмүүлэл” хэмээх хоёр сургууль ашиглалтад орж байгаа бөгөөд долоо, наймдугаар ангид тус тус 80, есдүгээр ангид 90 сурагч шалгаруулж авахаар болжээ. Бүртгэл энэ сарын 15- 26-нд болох бөгөөд шалгалтыг 27-ны өдөр авах юм байна. Энэ талаар БСШУЯ-ны дэргэдэх Боловсролын үнэлгээний төвийн захирал Б.Энхбатаас тодрууллаа.

-Шалгалт өгөхөөр хэдэн хүүхэд бүртгүүлээд байна вэ? Бүртгүүлэхэд юуг гол үзүүлэлт болгож байгаа вэ?

-Өнөөдрийн байдлаар нийт 270 хүүхэд бүртгүүлсэн. Судалсан хичээлүүдийн дундаж үнэлгээ 80 хувь буюу түүнээс дээш байх ёстой. Мөн хувийн хэрэг, сургуулийн тодорхойлолт, төрсний гэрчилгээ, суралцахыг дэмжсэн асран хамгаалагчийн өргөдөл хүсэлт хэрэгтэй.

-Хэдэн хичээлээр яаж шалгалт авах вэ?

-Матетматик болон англи хэлний шалгалтыг тестээр авна. Тестээ боловсруулчихсан байгаа.

-Босго оноо бий юү?

-Хавар есдүгээр ангийн 15 хүүхэд шалгаруулж авсан. Тэр үед босго оноог 575 гэж зааж байсан. Энэ удаа хэдэн хүүхэд бүртгүүлэх, тестийнхээ агуулга зэргээс шалтгаалж босго оноог тогтооно. Мөн БСШУЯ-ны Ерөнхий боловсролын газрын дарга Д.Эрдэнэчимэгээс Кэмбрижийн хөтөлбөрийн талаар тодруулсан юм.

-“Шинэ эрин” сургуульд хэдэн сурагч суралцаж байгаа вэ. Тодорхой шалтгаанаар хасагдсан хүүхэд байгаа юу?

-40 сурагч суралцаж байна. Ачаалал ихтэй байдаг ч суралцахгүй болсон хүүхэд байхгүй. Ирэх хавар эдгээр хүүхдээс олон улсын ерөнхий боловсролын шалгалт авна.

-Кэмбрижийн хөтөлбөрөөр хичээллэж байгаа сурагч юугаараа давуу вэ?

-Уг сургуульд сурч төгссөн хүүхэд хоёр гэрчилгээ авна. Кэмбрижийн олон улсын болон Монголын гэрчилгээтэй төгсөнө гэсэн үг. Энэ нь манай ЕБС-ийн боловсролыг дэлхийд хүлээн зөвшөөрч байгаа хэрэг. Түүнчлэн дэлхийн томоохон сургуулиудын бакалаврын зэрэгт шууд элсэн суралцах боломжтой болно. Мөн манай ахлах ангийн сурагчид заавал судлах 19 хичээл үздэг бол Кэмбрижийн хөтөлбөрөөр суралцаж байгаа сурагч арван хичээл үзэх юм.

-Нэг анги хэдэн хүүхэдтэй вэ. Өдөрт хэдэн цаг хичээллэх вэ?

-Нэг анги 20 хүүхэдтэй байна. Нэг ээлжээр 9.00-17.00 цагийн хооронд хичээллэдэг. Хичээл англи болон монгол хэлээр явагдана. Монгол хэл, Монголын түүх, монгол бичгийг монголоор, бусад хичээлийг англи хэлээр үздэг. Кэмбрижийн ерөнхий боловсролын олон улсын сурах бичгийг ашиглана. Багш нарын хувьд сонгон шалгаруулалт явуулж байгаа.

-Уг сургуульд суралцахын тулд сурагч төлбөр төлөх үү?