Бичлэгийн тоо 3,329
БНСУ-д
хөдөлмөрийн гэрээгээр ажиллахаар бүртгүүлсэн иргэдээс есдүгээр сарын
3-4-нд солонгос хэлний төвшин тогтоох шалгалт авахаар болсноо өчигдөр
Хөдөлмөр, халамжийн үйлчилгээний газраас мэдээллээ. Шалгалтыг
Улаанбаатар хот, Завхан, Ховд аймгийн төвд авна. Баянзүрхэд тус дүүргийн
болон Булганы иргэд, Сонгинохайрханд тус дүүргийнхнээс гадна
Сэлэнгийнхэн, Баянголд тус дүүргийн болон Багануур, Орхон, Өвөрхангай,
Баянхонгор, Дорнод, Хэнтий, Сүхбаатарын иргэд шалгалтаа өгнө.
Сүхбаатарт тус дүүргийнхэн болон Багахангай, Налайх, Архангай, Төв, Өмнөговь, Дундговь, Дархан-Уул, Дорноговь, Говьсүмбэрийнхэн, Чингэлтэйд тус дүүргийнхнээс гадна Хан-Уулын иргэд ирж, шалгалтаа өгнө. Хөвсгөл, Говь-Алтай, Завхан аймагт бүртгүүлсэн хүмүүс Завханы төвд, Баян-Өлгий, Увс, Ховд аймгийнхан Ховдын төвд очиж, солонгос хэлний мэдлэгээ шалгуулах юм байна. Шалгалт өгөхдөө гадаад паспорт эсвэл иргэний үнэмлэх, бүртгүүлэхэд олгосон шар хуудас, хар өнгийн балтай очоорой. Паспорт, иргэний үнэмлэх нь бүртгүүлэхдээ хуулбарлаж өгсөн тэр үнэмлэх, паспорт байх ёстой аж. Бичиг баримтаа мартсан хүнийг шалгалтад оруулахгүй. Шалгалтыг сонсох, унших гэсэн хэлбэрээр авна.
Эдгээр нь тус бүртээ 25 асуулт, 100 оноотой. Сонсох даалгаврыг 30, унших даалгаврыг 40 минутад хийх учиртай. Хоёр шалгалтын хооронд завсарлагагүй. БНСУ-аас томилогдсон комисс шалгалтыг авч, дүгнээд 80-200 оноо авсан хүмүүсийг онооны дарааллаар нь жагсаана. Эхний 3000 шалгуулагчийг тэнцсэнд тооцох юм байна. “Солонгос хэлний шалгалтад тэнцүүлж өгнө”, “Шалгалтын тест олж өгнө” гэсэн хүмүүст хууртахгүй байхыг Хөдөлмөр, халамжийн үйлчилгээний газраас анхаарууллаа. Шалгалттай холбоотой дэлгэрэнгүй мэдээллийг 11-263773 дугаарын утас, www.hh.gov.mn сайтаас аваарай.
