Олон ангит киноны ертөнцөд бүл нэмэх шинэ уран бүтээл “Монгол ньюс”- ээс мэндлэх гэж байна. Киноны нэр “Ханилснаас илүү амраг”. Үе тэнгийн таван найз бүсгүйн амьдралаар шинэ цагийн их хотын хэв маяг, бүтээн байгуулалт, хэрэглээ, өнгө төрхийг илэрхийлэх эл бүтээлийг “25 дугаар суваг” телевизийн 15 жилийн ойд зориулжээ.
Кино зохиолыг тус телевизийн сэтгүүлч Ч.Бүрэнжаргал, П.Дэмбэрэл, найруулагч Ц.Энхтуяа нар бичсэн. Бүсгүйчүүдээс амьдрал юу хүсдэг юм бол. Харин тэд амьдралаас юуг хүсдэг байж таарах вэ. Энэ асуултад хариулах 21 ангит уран сайхны кино есдүгээр сарын сүүлчээр үзэгчдийн хүртээл болно. Таван өөр мэргэжил, хэв маяг, дүр төрхтэй ч нэг хүсэл тэмүүлэлтэй бүсгүйчүүдийн дүрд “Шинэ үе” продакшны жүжигчин Д.Оюунтуул, “М Галакси” студийн захирал, жүжигчин Т.Өөдөө, жүжигчин Т.Нарангэрэл, Ө.Болормаа, М.Энхчимэг нар тогложээ.
“Ханилснаас илүү амраг” киноны зохиолч Ч.Бүрэнжаргалаас зарим зүйлийг тодрууллаа.
-Кино зохиолыг гурвуулаа хамт ран бичжээ. Киноны ажилд телевизийн бүх уран бүтээлч “дайчлагдаж” байна уу?
-Бид 21 ангитай кино зохиолыг 21 хоногийн дотор бичсэн. Кинонд телевизийн нийт уран бүтээлч буюу 30-аад хүн оролцож байгаа. Ерөнхий продюссерээр манай телевизийн тэрг үүн дэд захирал Л.Жаргалсайхан ажиллаж байна.
-Кино зохиол анх удаа бичсэн гэсэн. Бэрхшээл юу байв?
-Бичихэд бэрхшээл байгаагүй. Бид нэлээд эртнээс бүсгүйчүүдийн тухай кино хийе гэж дор бүрнээ бодсон байсан юм билээ. Тэгээд л хүсэл тэмүүлэл нэгдэж кино зохиолоо бичээд зургаа авч эхэллээ.
-Гол дүрийн жүжигчдээ хэрхэн сонгосон бэ?
-Найруулагч маань проб хийж, бидэнтэй зөвлөлдөөд жүжигчдээ сонгосон. Киноны дүрүүд 30 гарсан настай. Жүжигчид маань ч тэдэнтэй ижил.
-Өөрийнхөө таньдаг хэн нэгэн бүсгүйгээр төсөөлж дүрээ илэрхийлсэн тохиолдол байгаа юу?
-Мандухайгийн дүрд тоглож байгаа Д.Оюунтуул миний найз. Энэ дүрийг Д.Оюунтуулд зориулж бичсэн юм. Ялгаатай нь найз минь хараахан ээж болоогүй ч кинонд эх хүн болж хувирах юм. Киноны бусад дүр ч гэсэн эзнээ олсон.
Д.ОЮУНТУУЛ: ЭЭЖ БОЛОХ ГЭЭД ТЭВДЭЖ БАЙНА
-Энэ кинонд таны бүтээж буй дүрийн онцлог юу вэ?
-Бүрнээ, Дэмбэрэл, Энхтуяа гурав энэ зохиолын талаар жилийн өмнөөс ярьж байсан. Намайг олон ангит кинонд тоглоно гэсэн бодолтой байгаарай гэж сануулж байсан юм. Ажил ихтэй явсаар энэ тухай хэсэг мартчихаж. Гэтэл нэг л өдөр утасдаад зохиолоо аваарай гэсэн. Надад зохиол маш их таалагдсан. Өөрийнхөө насны эмэгтэйн дүрийг бүтээнэ гэдэг илүү хялбар юм. Мандухай бол барилгын инженер мэргэжилтэй, ажилсаг, ханьдаа үнэнч сайхан бүсгүй. 10 настай хүүтэй.
-Ээж байх ямар санагдаж байна.
-Манай кинонд тоглож байгаа дөрвөн бүсгүй хэдийнэ ээж болчихсон. Гэтэл би ганцаараа хүүхэдгүй хэрнээ 10 настай хүүгийн ээж болж байна. Эхэндээ хэцүү байсан. Манай хэд ч гэсэн намайг “Чи арай л хатуу байна. Өөрөө ээж болчихоор арай л өөр байдаг” гээд зааж өгнө. Хүүхэд эрхлүүлнэ гэдэг их өөр юм билээ. Одоо л хүүтэйгээ илүү дотно болж байна.
-Киноны ажил хэдэн хувьтай үргэлжилж байна вэ?
-Киноны зураг авалт долдугаар сарын 29-нд эхэлсэн. Бараг 40 хувьтай явж байгаа. Зургийг яг үйл явдлын дарааллаар нь авдаггүй. Тэгэхээр олон ангит кинонд тоглож байхдаа үүнийгээ сайн тооцохгүй бол толгой эргэх шинжтэй.
