“Мэргэжлийн
сүмогийн 69 дэх их аварга Хакүхо Монголд гүүр бэлэглэх гэж байна”
хэмээн Японы “Никкан спортс” сонин энэ сарын 13-нд бичсэн байна. Монгол
Япон хоёр орны хооронд хамтын ажиллагааны гүүр болон зүтгэж яваа Хакүхо
жинхэнэ гүүр эх орондоо бариж өгөхөөр амлажээ.
Зуныхаа амралтаар Монголд ирэхэд нь түүнийг ерөнхий сайд С.Батболд хүлээн авч уулзан, ерөнхий сайдын өргөмжлөлөөр шагнасан билээ. Энэхүү хүлээн авалтын үеэр Хакүхо гүүр барих төлөвлөгөөтэй байгаагаа ярьсан байна. Одоогийн байдлаар гүүрээ хаана, хэзээ барих нь тодорхойгүй байгаа ч гэсэн ерөнхий сайдад амласан болохоор барьж өгөх нь мэдээж биз ээ.
Хакүхо одоо Токүшима мужид айлчлан аялал жуулчлалын элчийнхээ үүргийг гүйцэтгэж яваа аж. Энэ сарын 12-нд Токүшимад болсон бүжгийн баярт оролцон, эвлэг хөдөлгөөнөөрөө олныг гайхуулжээ. Хакүхо бэлтгэлээ энэ сарын 17-ноос эхлэх гэнэ.
