Жилээс жилд их, дээд сургуулиуд сургалтын төлбөрөө 10-20 хувиар нэмдэг. Энэ удаа уг байдал давтагдах бололтой. Учир нь төрийн өмчийн МУИС, МУБИС, ХААИС, ЭМШУИС зэрэг томоохон сургууль сургалтын төлбөрөө 20- 30 хувиар нэмэхээ олон нийтэд зарлажээ.
Энэ талаар БСШУЯ-ны Хэвлэл мэдээллийн ажилтан Л.Зоригтоос тодруулахад “Их, дээд сургуулиудын удирдах зөвлөл хуралдаагүй байгаа. Сургалтын төлбөрийг нэмэхдээ тухайн жилийн инфляцын төвшингөөс давуулж болдоггүй.
Энэ жилийн инфляцын төвшинг Үндэсний статистикийн газраас 9.4 хувь гэж гаргасан байсан. Тиймээс сайд тогтоосон хувь хүртэл төлбөр нэмэхийг зөвшөөрсөн байгаа. Сургалтын төлбөр нэмэх талаарх мэдээллээ сургуулиуд албан ёсоор манайд ирүүлээгүй. 9.4 хувиас дээш нэмсэн тохиолдолд тухайн сургуулийн удирдлагуудтай хатуу хариуцлага тооцохоо сайд мэдэгдсэн” гэв.
