Жинхэнэ сенсааци ч дэгдлээ дээ. Гэхдээ жижигхэн Монголд биш дэлхийн энгээр сумогийн 68 дахь их аварга Асашёорюүгийн мандаасан хэргийн талаар бичих нь бололтой.

          Омог ихт Монголын их аварга арлын Японд төдийгүй эх орондоо удаа дараа зодоон цохионы хэрэгт орооцолдож байлаа. Их аваргын их амжилтын цаг үед эдгээр хэрэг явдлууд гардаг байсан тул түүний тарьсан сенсааци нь бахархал, бардамналын шуугианд дарагдаж хоромхон зуурт илааршдаг байв. Анх Кёкүшюзаны 250 мянган долларын үнэтэй бенз машины толийг яйруулснаас хойш Япон банди нарын бөгсөнд дартасны сум зоож, хошин шогийн жүжигчин Эрдэнэзааныг “Face” клубт нам цохин унагаж, Япон зоогийн газрын эзнийг хэвтэрт оруулж, өөртэй нь уулзсангүй хэмээн гоморхохдоо нэгэн алдартай гэр бүлийн охины машины хамрыг ямби нүдэж манай аваргын мандуулсан хэрэг тоймгүй ээ. Энэ бүхнийг эргэн сануулсан, сэдрээсэн хэрэг явдлыг их аварга маань өнгөрөгч долоо хоногт согтуудаа үйлджээ.

Тэр “гайтай” өдөр Аса аварга Драмын театрын дэргэд байх хоёр давхар MB төвд олны танил нэгэн бүсгүйтэй хамт наргижээ. Сэтгэл нь хөөрсөн их аварга болзоот бүсгүйдээ “Централ таур”-ын нэг давхарт байрлах LV брэндийн дэлгүүрээс бэлэг авч өгөхөөр болж. Утсаар ярьсны дараахан LV-гийн ажилтнууд каталогоо барьсаар аваргын байгаа газарт нь хүрээд ирж. Каталог хэсэг эргүүлсний дараа аварга, бүсгүй хоёр хамтдаа очиж амьдаар нь бараануудтай танилцах хүсэлтэйгээ илэрхийлжээ. Тэднийг ирэх сургаар LV брэнд дэлгүүрийн дээгүүр албаны эрхэм оргилуун дарс барьсаар ВИП өрөөндөө гүн хүндэтгэлтэй угтсан байна. Аварга маань оргилуун дарс шимж, бүсгүй хувцас хэрэглэл сонгож яг л барууны оддын жишгээр тун ч романтик мөчийг эхлүүлжээ.

Гэтэл төлбөр хийх цаг болоход бүсгүйн сонгосон бараа 15 сая болсон байна. Их аварга картаа өгтөл дансных нь үлдэгдэл бүсгүйн авсан барааны төлбөрийг хийж хүчирсэнгүй. Худалдагч учир байдлаа хэлэхэд Аса аварга “Би банкны эзэн хүн. Үндэсний хөрөнгө оруулалтын банк руу ярьж, наад төлбөрөө ав” гэжээ. Банк руу ярьтал “Бид энэ асуудлыг шийдэх боломжгүй” гэсэн хариулт өгсөн байна. Үүний дараа их аварга гэнэт агсарч оргилуун дарсны хундагыг эхлээд шиджээ. Дараа нь оргилуун дарсыг ч авч шидсэн байна. Улмаар ширээ, буйдан бүгдийг нь авч чулуудан шил толь болсон дэлгүүрийг яг л гамин талсан мэт болгожээ. Хамгийн “тэнэг” нь, ийнхүү дайн дажин болж байхад мөнөөх бүсгүй “Би сонгосон бараагаа авч явна” хэмээн тас тэврээд гуйвж дайван зогссоор байжээ. Эх сурвалжийн яриагаар бол аваргын картнаас төлбөрийг хийхэд багахан мөнгө л дутсан аж. Хэрвээ тэр хүүхэн зарим нэг бараанаасаа татгалзсан бол бүх зүйл ок болох байжээ.

          Энэ бүхэн дэлгүүрийн хяналтын камераар дамжин Парис дахь LV-гийн төв оффист хүргэгдсэн байна. Энэ талаарх шийдвэрээ LV-гийн захиргаа энэ долоо хоногт гаргах аж. Мэдээж аваргын учруулсан хохирол багагүй байж таарна. Гэвч хагарсан шил толинд биш, LV брэндийг үл хүндэтгэсэн явдал нь их аваргад хүндээр тусч мэдэх нь. Германы хоёр хөл бөмбөгчин яг ийм авир гаргаж, LV-г гомдоосныхоо хариуд олон сая долларын торгууль төлж, хоёр яс салсан түүхтэй. Тэгвэл Асашёорюүд ямархуу шийтгэл, зарга ирэх нь одоогоор тодорхойгүй байна.

Монголчууд бид их аваргадаа дэндүү хайртай. Сэтгэл зүрхнийхээ гүнээс аваргынхаа амжилтаар, эх оронч үзлээр нь бахархаж явдаг ард түмэн. Харийн соёл, харийн спорт гэлтгүй манай аварга, миний хүү гэж хошуу дэвсдэг Монгол зон олонд Д.Дагвадорж дандаа ийм бэлэг бариад байж болохгүй. Хайрласных нь хариуд хайрла гэж сайхан үг бий. Одоо манай аварга жаахан хүүхэд биш. “Би улс төрд орно, Монголын парламентад нэр дэвшинэ” гэж Японы томоохон хэвлэлд өгсөн ярилцлага, сэтгүүлч Ганчимэгтэй хийсэн ярилцлага зэргээс харахад түүний бодол цэгцэрч, аль эрт эрийн цээнд хүрснийг илтгэн харуулдаг. Дэлхийд танигдсан энэ хүнийг Монголын парламентад сонгоход болохгүй зүйл байхгүй. Улс төр өөрөө олон урьгалч үзлийн талбар. Энд нийгмийн янз бүрийн давхаргын төлөөлөл цуглах учиртай. Аваргын нэр нөлөө олон улсад тодорхой асуудлуудыг шийдэхэд хэрэг болж мэднэ.

           Харин Асашёорюү их аваргын энэ зан байдал улс төрд битгий хэл нийгмийн наад захын ёс зүйд нийцэхгүй гэдэг нь хэнд ч ойлгомжтой. Амжилт, алдар хүндийн оргилд гарч чадсан шигээ сэтгэлийн их хат, ухааны их бяр гаргахгүй бол Аса аваргыг маань ямархан хувь тавилан хүлээж байгааг төсөөлөхөд бэрх байна.

Ө.Мэргэндүү.

Zindaa.mn – Үндэсний чөлөөт мэдээллийн шилдэг портал