Бразил-2014” дэлхийн аварга шалгаруулах тэмцээний урьдчилсан тоглолт Хөлбөмбөгийн холбооны ногоон талбайд өчигдөр болж, Монголын шигшээ Мьянмарын багийг хүлээн авч тоглолоо. Зургадугаар сард гарсан дэлхийн хөлбөмбөгийн чансаанд Мьянмарын баг 167 дугаарт бичигдсэн бол Монголын шигшээ 179-д эрэмблэгджээ. Манай багийн ахлагч Д.Лүмбэнгарав гэмтэлтэй тул Б.Гарьдмагнай ахлагчийн туузыг зүүж, багаа тулаанд оруулсан. Хэдийгээр талбай дээрээ тоглож байгаа ч манайхан тоглолтын эхэнд сандарч, тэвдэн, бөмбөгөө алдаж байлаа.
Америкаас дуудаж ирүүлсэн А.Мөрөн урд хэчнээн гүйсэн ч түүнд бөмбөг бараг очихгүй байв. Хааяа нэг сөрөг довтолгоо хийснийг эс тооцвол бөмбөг ихэнхдээ манай талбайгаас гарахгүй байсан. Үзэгчдийнхээ өмнө тоглоход биеэ бариад хэцүү байдаг гэж манай нэг тоглогч хэлсэнчлэн үнэхээр хөдөлгөөн муутай харагдаж байв. Гэвч эхний үеийн дунд хэсгээс хоёр ч удаа аюултай довтолж, гоол оруулах дөхсөний дараанаас тоглолт орж эхэллээ. Манайхан ихэнх довтолгоогоо зүүн жигүүрээр эхлүүлж байсан ч сүүлийн дамжуулалт оновч гүйгээс бөмбөг оруулах болом жоо алдсаар эхний үе өндөрлөсөн. Харин хоёрдугаар үед огт өөр баг орж ирсэн юм. Дасгалжуулагч С.Эрдэнэбатын үүрэг сургаал үр дүнгээ өгч, манайхан ч Мьянмарыг хожиж чадна гэдэгтээ итгэлтэй болсон байв. Ингээд л дайрч эхэлсэн. Талбай дээрээ хожихгүй бол дараагийн тоглолтод хэцүү тул дасгалжуулагч дайрах тушаал буулгасан нь мэдээж. Хоёрдугаар үеийн хоёрдахь минутад манай багийнхан баруун жигүүрээс довтлон, Мьянмарын хамгаалагчдын толгойг эргүүлсэн уран хувилбар хийж, 10 дугаартай Х.Цэнд-Аюуш сайхан гоол хийлээ.
“Дахиад, дахиад” гэх үзэгчдийн уухайд хариу өгөхөөр довтлон, дамжуулалт нь ч оновчтой болж, хэр барагтай бөмбөгөө алдахаа больжээ. Мьянмарынхан тоог тэнцүүлэх санаатай холын дамжуулалт хийсэн ч хамгаалагч нар хиймэл отон тоглолтод оруулан зогсоож байв. Хааяа нэг хаалга руу цохисныг нь хаалгач Ц.Ганбаяр аюулгүй болгож байлаа. Хугацаа дуусах дөхөх тусам өрсөлдөгчид маань шатаж эхэлсэн бололтой, дүрэм зөрчиж эхэллээ. Улмаар тэдний нэг нь улаан хуудсаар бангадуулаад талбайг орхин одсоноор манай баг дэлхийн аварга шалгаруулах тэмцээний урьдчилсан тоглолтод анхныхаа ялалтыг авах нь ойлгомжтой болсон. Одоо тэднийг долдугаар сарын 3-нд Мьянмарын талбайд хүнд хэцүү тоглолт хүлээж байна. Энэ давааг давчихвал “Хөх чоно”-нуудыг Оманы баг сорино. Түүхэн ялалт байгуулсан шигшээ багтаа амжилт хүсье. Тоглолтын дараахь хэвлэлийн бага хурал дээр Мьянмарын дасгалжуулагч Милан Живадинович “Бид 23 хүртэлх насны залуу тамирчдаа авчирсан. Өнөөдрийн тоглолтод хо жиж чадаагүй ч нутагтаа ялна гэдэгтээ улам итгэлтэй боллоо.
Манай шилдэг таван тоглогч Монголд ирээгүй” гэж ярив. Харин Монголын шигшээ багийн дасгалжуулагч С.Эрдэнэбат “ОХУ-д бэлтгэл хийсэн маань их тус болсон. Ялна гэсэн зорилгодоо хүрсэндээ баяртай байна. Мьянмарын багийн талаарх мэдээллийг интернэтээс л авч байлаа. Сөрөг довтолгоо хийдэг, хурдтай баг юм. Мьянмарт энэ бүрэлдэхүүнээрээ тоглоно. Ялахын төлөө л зүтгэнэ дээ” гэж ярьсан.
М.СУГАРАА
