Ази тивд төдийгүй хилийн чандад Кэй-Поп урсгалыг таниулж байгаа уран бүтээлчид бол БНСУ-ын Wonder Girls, Big Bang, Shinee, Super Junior зэрэг хамтлаг дуучид билээ. Азийн улс орнуудын дуу хөгжмийн салбарын хөгжилд БНСУ-ын Кэй-Поп, Японы Жэй Поп урсгалууд үлэмж хувь нэмэр оруулсан гэж мэргэжилтнүүд үздэг. Тэгвэл БНСУ-ын тэдгээр одууд болон Ази тивийн шинэ, залуу, авьяаслаг уран бүтээлчид хамтран, сонирхолтой, хөгжилтэй, өрсөлдөөнтэй тэмцээнийг зохион байгуулсан байна. БНСУ-ын KBS World телевизээс санаачлан зохион байгуулдаг “Dream Team” тэмцээн нь олны танил алдартнуудыг хооронд нь өрсөлдүүлж, авхаалж самбааг нь сорьдог маш өвөрмөц тэмцээн юм. 
KBS World телевиз нь 8-н жилийнхээ ойг тэмдэглэн өнгөрүүлэх хүрээнд Ази тивийн шинэ залуу, өсөх ирээдүйтэй уран бүтээлчид болон БНСУ-ын одуудтай хамтарсан шоу нэвтрүүлгийг бэлтгэсэн нь тун удахгүй буюу энэ сарын 29-ны өдөр KBS World сувгаар дамжин, дэлхий нийтэд цацагдах гэж байна. Энэхүү шоу нэвтрүүлэгт Монгол улсын төлөөллийг оролцуулах тал Сансар Кабелийн Телевиз, Сансар Медиа Групп ихээхэн хүчин чармайлт гарган ажилласан байна. “Мөрөөдлийн баг” шоу нэвтрүүлэгт UBS телевизээс санаачлан зохион байгуулдаг Universe Best Songs тэмцээний шилдэг оролцогчид болох Ану, Мишээл нар Монгол улсаа төлөөлөн оролцжээ.
Залуу уран бүтээлчдийн хувьд энэхүү шоу нэвтрүүлэгт оролцсоноор Ази тивийн дуу хөгжмийн томоохон төлөөлөгчидтэй уулзаж нөхөрлөх, тэднээс суралцахад тусалсан нь дамжиггүй. Шоуг зохион байгуулагч KBS World Телевизийн хувьд оролцогчдыг 25-аас доош насны байх, англи хэлийг эх хэл шигээ өндөр түвшинд эзэмшсэн, мөн шинэ залуу, авьяаслаг уран бүтээлч байх хатуу шаардлагыг тавьсан байна. Дахин хэлэхэд Universe Best Songs тэмцээнээс төрөн гарсан залуу дуучин Ану, Мишээл нарын оролцсон “Мөрөөдлийн баг” тэмцээний эхний хэсэг энэ сарын 29-нд, харин 2-р хэсэг нь ирэх 7-р сарын 6-нд 16.50 минутаас KBS World телевизийн дэлгэцээр цацагдах юм байна.