МИАТ компанийн нэмэгдэл нислэгийн асуудлыг Солонгосын эрх бүхий байгуулагууд өдий болтол удаашруулж байгаад бид туйлын харамсаж байна.

 

“МИАТ” компанийн Солонгосоос Улаанбаатар луу ирэх нислэг саатаж, алба, амины ажлаар зорчих гэж байгаа 200 гаруй иргэд бухимдаж байгаа талаарх мэдээлэл манайд ирлээ. Энэхүү мэдээллийн дагуу “МИАТ” компанийн хэвлэлийн төлөөлөгч Л.Ундралаас тодруулсан юм.

 

 

Солонгосоос Улаанбаатар орох чиглэлийн МИАТ компанийн онгоц саатаж, 200 хүн Солонгосд гурав, дөрөв хонож байгаа гэсэн. Мөн шинээр гаргасан онгоцыг хүлээж авахгүй байгаа гэсэн. Энэ талаар тайлбар хийнэ үү?

 

 

-      МИАТ хувьцаат компанийн онгоц нислэгт тэнцэхгүй зэргээс үүдэн нислэг саатсангүй. 2011 оны зургадугаар сарын 23-24-ны өдрүүдэд нэмэлт нислэг хийх эрхийг Солонгосын холбогдох албаныхан өгөхгүй байгаагаас үүдэн энэхүү нэмэлт нислэгүүд хийгдэхгүй байна. МИАТ компани нь хоёр улсын Засгийн газрын хоорондын хэлэлцээрийн хүрээнд Монголын талаас албан ёсоор томилогдсон авиа компани юм.

 

Яг өнөөдрийн байдлаар нислэг саатсан ажлын тухайд ямар арга хэмжээ авч байна?

 

 

-       Өнөөдрийн байдлаар зургадугаар сарын 22, 23-ны өдрүүдийн Сөүл-Улаанбаатар чиглэлийн нэмэлт нислэг цуцлагдаад байна. Нийт 280 зорчигч Улаанбаатарт ирэхээр Сөүл хотод хүлээж байгаагаас18 зорчигч нь өөрсдийн зардлаар Сөүлээс Бээжин хотод ирж, Бээжингээс Улаанбаатарын чиглэлд өнөөдөр өглөө буюу 2011 оны 6 дугаар сарын 27-ны ОМ224 нислэгээр ирж байна. Эдгээр зорчигчдын зөрүү төлбөрыг Улаанбаатарт ирсэн хойно олгохоор болоод байгаа. Маргаашийн нислэгүүдэд  Б767-300 онгоц нисгэхээр төлөвлөж байгаа ба тухайн өдрийн зорчих зорчигчдоос гадна хүлээгдэж буй 100 зорчигчыг тээвэрлэх зэргээр цуцлагдасан нэмэлт нислэгийн зорчигчдыг Улаанбаатарт тээвэрлэн авчрахаар төлөвлөж байна. Яг өнөөдрийн нислэгээр хүлээгдэж байсан 100 гаруй зорчигчдоо авчирч байгаа.

 

Тэнд байгаа иргэд ихээхэн бухимдалтай байгаа. Тэдгээр хүмүүст танай компанийн зүгээс ямар нэг тусламж үзүүлж байгаа юу?

 

 

-       Зорчигчдын тав тухыг алдагдуулахгүйн тулд бид байр, хоолоор үнэгүй үйлчилж байна. Мэдээж иргэд бухимдалтай байгаа. Тиймээс бид яаравчлан арга хэмжээ авахын тулд ажиллаж байна гэсэн хариултыг бидэнд өглөө.

 

“МИАТ” компанийн зүгээс өөрсдийн нэр хүнд, байр сууриа хадгалж үлдэхийн тулд Солонгосын чиглэлийн нэмэлт нислэгийн талаархи байр сууриа илэрхийлсэн доорх мэдэгдлийг хийжээ.

 

Уг мэдэгдэлд: “МИАТ” компанийн нэмэгдэл нислэгийн асуудлыг Солонгосын эрх бүхий байгуулагууд өдий болтол удаашруулж байгаад бид туйлын харамсаж байна.   МИАТ компани нь Монгол Солонгос хоёр улсын хооронд байгуулсан агаарын харилцааны Засгийн газар хоорондын хэлэлцээрийн хүрээнд  Монголын талаас албан ёсоор томилогдсон авиакомпани билээ.

 

 

Энэ учраас  МИАТ компани нь зуны улиралын зорчигчдийн өсөн нэмэгдэж буй эрэлт шаардлагыг хангахаар нэмэгдэл аялалыг төлөвлөн үйлдэх үүрэгтэй эрхтэй. Гэвч Монгол Солонгосын агаарын харилцааны хэлэлцээрийн мухардалд ороод байгаа асуудлыг шийдүүлэхээр МИАТ компанийн нэмэгдэл нислэгийг боон хаагдуулж шахалт үзүүлэн иргэд зорчигчдод чирэгдэл учруулж байгаа нь зохисгүй үйлдэл гэж үзэж байна.  Солонгосын холбогдох албаныхан Кореан Эйр компанийн нэмэгдэл нислэгэд зөвшөөрөл олгосон атлаа МИАТ-ын аялалд зөвшөөрөл олгохгүй  ялгаварласан бодлого явуулж байгаа нь үнэхээр зохимжгүй  байна.

 

МИАТ компани Солонгос Монголын зах зээл дээр хэзээд олон суудал гарган нэгжийн үнэ өртөгийг бууруулахыг эрмэлзэж ирсэн ба одоо ч нэмэгдэл нислэгүүдийг үйлдэн иргэд зорчигчдод үйлчлэхэд бэлэн байна. Бид өдий хүртэл эл асуудлыг хоёр орны Яамд, ИНЕГ зэрэг албаны хэмжээнд шийдвэрлэхийг хичээж ирсэн бөгөөд асуудал ийм байдалд хүрсэн тул бид арга буюу Солонгос, Монголын олон нийт манай үйлчлүүлэгч зорчигчдод хандахаас өөр аргагүй байдалд хүрээд байна.

 

 

Монгол Солонгосын агаарын тээврийн зах зээлд Солонгосын өөр агаарын тээвэрлэгчийг оруулахаар тулгаж буй шахалт нь эрүүл өрсөлдөөн үүсгэхээсээ илүүтэйгээр Монголын тээвэрлэгчийг богино хугацаанд өрсөлдөөнөөс хүч хавсран шахан гаргаж цаашид энэ зах зээлд Солонгосын талынхны монополчлол тогтоохыг эрмэлзэж буй үйлдэл гэж үзэх үндэслэл байна. Нэгэнт аль нэг талын монопольт байдал тогтвол эрүүл өрсөлдөөн байхгүй болж үнэ тариф хямдрах асуудал арилдаг нь олон салбарын жишээн дээр харагддагийг бүгд мэднэ. 

 

 

Дахин тэмдэглэхэд, албан ёсоор томилогдсон тээвэрлэгчийн хүрээнд МИАТ компани нэмэгдэл аялал үйлдэх бүрэн эрхтэй бөгөөд түүнийг хязгаарлах хаах шалтгаан огт байхгүй.  Хэрэв эдгээр аялалууд цуцлагдвал үүнээс үүдэн гарах асар их хохиролыг МИАТ огт хариуцахгүй бөгөөд зорчигчдийн эрэлт хэрэгцээг хангах гэсэн МИАТ-ын  бодлогод огт буруу байхгүй гэдгийг хариуцлагатайгаар мэдэгдэж байна. 

 

 

 

    Ямартаа ч эх орон, гэр бүлийнхэн дээрээ ирэх гэж байгаа тэдгээр монголчуудын асуудлыг Монголын Иргэний Агаарын Тээврийн хамгийн том компани хэмээн өөрсдийгөө өргөмжилдөг “МИАТ” компани хариуцлагатай хандах байлгүй дээ. Дашрамд дурдахад шинээр нислэгт нэвтрүүлсэн онгоцныхоо баярыг тэмдэглэж “МИАТ” компанийн захирал Ц.Орхон төдийгүй албаны хүмүүс, Ерөнхийлөгч Ц.Элбэгдоржийн хамтаар ёстой л нэг дунд чөмгөө дундаа хийн, дураараа цэнгэж, гадны олон улс орноор аялаж, амраад ирсэн гэнэ шүү. Зугаа цэнгэлд анхаарч байхаар зорчих тээврийн үйлчилгээндээ анхаараасай гэж Ц.Орхон даргаас хүсэж байна.