Эмийн сангуудад зарж буй 170 эмийг нийслэлийн Мэргэжлийн хяналтын газраас шинжилж үзэхэд зөвхөн 27 нь стандартад нийцжээ.
Монголчуудын өргөн хэрэглэдэг дебазол, парацетамол, A, С витамин, анальгин зэрэг эмээс гадна “тураана, таргалуулна, гоё сайхан болгоно” гэх тайлбартай олон төрлийн хуурамч эмийг манай улсад худалдаалж буйг тэд өчигдөр хийсэн хэвлэлийн хурлынхаа үеэр хэлэв.
Саяхан Мэргэжлийн хяналтын ерөнхий газраас нийслэлийн эмийн сангуудад шалгалт хийхэд 64 эмийн санд манайд бүртгэгдээгүй 11 нэр төрлийн эм худалдаж байсан зөрчил илэрчээ. Улсын хэмжээнд 1200 эмийн сан байдгийн 500 гаруй нь Улаанбаатарт үйл ажиллагаа явуулдаг аж. Эмийг улсын бүртгэлд бүртгэхдээ үйлдвэрлэсэн улс, тун хэмжээ, хэлбэрийг нь шалгаж, хаяг савлагааг нь баталгаажуулдаг юм байна.
Хуурамч эмийг илрүүлэх зорилгоор ирэх аравдугаар сар хүртэл хилийн боомтуудад шалгалт хийхээр болжээ. Учир нь Замын-Үүд, Сүхбаатар зэрэг боомтоор хуурамч эм, зүү тариур их хэмжээгээр оруулж ирсэн хэрэг цөөнгүй илэрсэн аж.
