МАН-ын Удирдах зөвлөл гурав хоногийн өмнө ажил хэрэгч байдлаар, чухал сэдэв хөндөж хуралджээ. Хуралдсан тухай дуулангуут улс төрийн ямар асуудал хэлэлцээ бол гэтэл огт өөр, монголчуудын хамгийн их санаа зовоож буй зүйлд анхаарлаа хандуулахыг хүсчээ. Эрх баригч намын удирдах байгууллага газрын тос боловсруулах үйлдвэрийн тухай тойрч ярилцсан байна.

УИХ-ын бүтэц шиг МАН дэргэдээ төрөлжсөн Байнгын хороодтой. Энэ удаа Эдийн засгийн бодлогын байнгын хорооноос бензин, шатахууны асуудлаар мэдээлэл хийж, газрын тосны хэрэглээ, хангамж, хайгуул, олборлолт, үйлдвэр байгуулах нөхцөл боломжийн талаар Удирдах зөвлөлийн гишүүдэд мэдээлэл өгч, өнөөдрийн хүнд нөхцөл байдлаас гарах арга замын талаар ярилцсан байна. Олон Засгийн газар хичээгээд шийдэж чаддаггүй асуудлуудад ч Удирдах зөвлөл анхаарлаа хандуулжээ.

Монгол Улсад олборлож буй нефтийн бүтээгдэхүүний түүхий эдийг 100 хувь дотооддоо нийлүүлэх талаар Бүтээгдэхүүн хуваах гэрээнд өөрчлөлт оруулах, ОХУ-тай газрын тос нийлүүлэх тухай улс төрийн намууд, Ерөнхийлөгч, Засгийн газрын төвшинд тохиролцсон шийдвэр, Кувейт, Казахстанаас авах хоёр сая тонн түүхий газрын тосны тухай тохиролцоог албан ёсны болгож баталгаажуулах талаар УИХ дахь бүлэг, Засгийн газарт чиглэл өгөхөөр болсон байна.

Улс төр, эдийн засгийн стратегийн ач холбогдолтой энэ асуудлыг шийдвэрлэхийн тулд УИХ, Засгийн газар яаралтай арга хэмжээ авах ёстой гэж МАН-ын Удирдах зөвлөл үзэж зөвлөмж гаргажээ. Эрх баригч энэ нам олон жил дуншсан асуудлаар улс төрийн ийм зоригтой шийдвэр гаргасан болохоор суурь бүтээгдэхүүний хомсдол, хямралаас бид удахгүй гарах байх гэж найдъя.

www.mongolnews.mn - Эх нутгийн чимээ