БНСУ-д 30 гаруй мянган монгол хүн ажиллаж, сурдаг. Тэдний дунд хүүхэд багачууд ч багтана. Аав, ээжийгээ дагаж очсон монгол хүүхдүүд 1990-ээд оны дунд үед эзэнгүй шахам гадаа тоглож өнждөгийг анзаарсан нэгэн солонгос хүн тэдэнд солонгос хэл зааж эхэлжээ. Ингэж 1999 оны арванхоёрдугаар сард Сөүл хотноо анхны монгол сургууль байгуулах суурийг тавьсан аж. Өдгөө 81 монгол хүүхэд энэ сургуульд сурч, эх хэлээрээ боловсрол эзэмшин солонгос, англи хэл үздэг болжээ. Мэргэжлийн багш нар ч Монголоос очсон байна.

Сургуулийн багш нар дэд сайдад анги танхимаа танилцуулж, сурагчид бэсрэг урлагийн тоглолт үзүүлжээ. Монгол багш нар цалин хөлс, нийгмийн даатгал, сурах бичиг, сургалтын хөтөлбөрийн талаар зовлон жаргалаа ч хуваалцжээ. Сургуулийн эрэлт хэрэгцээ ихэсч, хичээлийн болон дотуур байрны хүрэлцээ муудаж эхэлсэн гэнэ. Сургуулийн шинэ байр барихаар газар авсан, үүнийг Монгол Улсын БСШУЯ дэмжиж өгөхийг сургуулийн захирал хүсчээ. Сурагчдын 80 хувь нь дотуур байранд амьдардаг. Энэ сургуулийн эрхэм зорилго сайн хүн болох, бие биеэ хайрлах, эх орондоо эргэж  заавал очих явдал гэнэ. Ийнхүү хилийн чинадад Монголын хойч ирээдүй үеийнхэн сайн хүн болохоор хичээн суралцаж байгаа юм байна.