Япон,
Америкийн Засгийн газар Монгол Улсад цөмийн хаягдлын агуулах барих
тухай нууц хэлэлцээр хийж байсан тухай мэдээлэл ихээхэн шуугиан тарилаа.
Японы Гадаад явдлын орлогч сайд Такахаши энэ мэдээллийг хүлээн
зөвшөөрсөн бол Монголд тус улсаас суугаа Элчин сайд Т.Кидокоро, Гадаад
харилцааны сайд Г.Занданшатар нар түүнийг няцаагаад байгаа юм. Гэсэн ч
энэ асуудал Монгол Улсын төр, засгийн төвшинд хурцаар яригдаж эхлэв.
УИХ-ын гишүүн Д.Энхбат, Ц.Сэдванчиг, Г.Баярсайхан, Н.Батбаяр нар өчигдөр Ерөнхий сайд С.Батболдод хандаж “цөмийн хаягдлын агуулах”-ын асуудлаар асуулт тавьж, хариу хүсчээ. Түүнийг бүрэн эхээр нь хүргэе. “Сүүлийн үед гадаадын хэвлэл мэдээллийн CNN, BCC, Ройтерс агентлаг Монгол Улсын нутаг дэвсгэрт цөмийн хаягдал булшлахаар АНУ, Япон Улсууд Монгол Улстай гэрээ байгуулахаар зэхэж буй талаар мэдээлсэн.
Тухайлбал, Японы “Майничи” сонинд “Японы Эдийн засаг, худалдааны яам нь Америкийн Энергийн яамтай хамтран цөмийн хаягдлыг хадгалах олон улсын анхны байгууламжийг Монголд барих төлөвлөгөөг нууцаар явуулж байгаа тухай” мэдээлэл гарчээ. Иймд Танд дараах асуултыг тавьж байна.
1.Монгол Улсын Засгийн газраас цөмийн хаягдлын талаар баримталж буй өнөөгийн албан ёсны байр суурь,
2.Монголын Улсын нутаг дэвсгэрт урьд нь цөмийн хаягдлыг нууцаар булж байсан гэх мэдээллийг үндэслэлтэй эсэхийг шалгаж тогтоосон талаар тодорхой баримт, мэдээлэл,
3. Монгол Улсын Засгийн газраас бусад улс орнуудтай цөмийн хаягдлыг булшлах, хадгалах талаар гэрээ, хэлэлцээр хийж байсан эсэх талаар тус тус мэдээлэл өгнө үү. Асуултын хариуг УИХ-ын тухай хуульд заасан хугацаанд бичгээр ирүүлж холбогдох Байнгын хорооны хуралдаанд сонсгохыг Танаас хүсье” гээд гишүүд гарын үсгээ зуржээ.
УИХ-ын гишүүний асуултад Ерөнхий сайд 14 хоногийн дотор хариу өгөх ёстой юм байна.
