Урлагийнхан гэдэг цаг наргүй ажилтай улс. Тэдэнд гэрийн хоол иднэ гэдэг бараг л мөрөөдөл. Ер нь урлагийнхан бидэн дунд өөрөө хоол хийх хүн өдрийн од шиг дээ хэмээн өгүүлэх “Шинэ үе” продакшны захирал Ариунболд буюу Бооёог сонинынхоо гал тогоондоо урилаа.
-Шинэ киноны нээлт гээд сүүлийн үед их завгүй байх шиг байна. Ер нь гэртээ амарсан үедээ ямар хоол хийх дуртай вэ?
-Ах нь “Хоёр хоёрын тав” гэсэн хоолонд их дуртай даа. /инээв/. Шинэ гарсан бүтээлдээ дэндүү их хайртай болоод байгаа учраас сүүлийн үед ийм хоол зохиоё гэж бодоод байгаа юм аа. За за тоглосон юм. Бооёо гэдэг хүн “Жунз” гэж Монгол үндэснийхээ хоолонд дэндүү их дуртай. Энэ хоол ядаргаа тайлна, бас их амттай.
-Хийх аргыг нь хэлээч?
-Эхлээд гурилаа зуураад, элдээд, тослоод, бөөрөнхийлж орооно. Гурилаа бэлдэж байх хоорондоо ногоотой юм уу хар шөл буцалгаад байж байх хэрэгтэй. Гэхдээ шөл нь бага зэрэг өтгөн байна шүү. За тэгээд шөл нь сайхан буцлаад болоод ирэх цагт нь гурилаа дээр нь тавьж болгоод л шөлөндөө гурилаа дүрээд иднэ дээ. Гэхдээ гурилаа хэтэрхий их болгож болохгүй. Нялцайгаад муухай болчихдог юм. 15-20 минут болгоход болно доо. Махны амт орсон шөлөнд гурил дүрээд идэхээр бас л сайхан шүү. Бүр шүлс гоожчихлоо./инээв/
-Энэ хоолоо та ямар үед ихэвчлэн хийдэг вэ?
-Сайхан ааш хөдөлсөн үедээ хийнэдээ. Ажил төрөл бүтсэн баяр ёслол гээд л. Жунз хийхээр шийдсэн л бол өглөө орой хамаагүй хийж идэж байж л санаа минь амарна.
-Гадуур хооллохдоо голдуу ямар хоол иддэг вэ?
-Цагуурын байдлаас шалтгаалж хоолоо сонгож иднэ. Хүйтэн бол шөлтэй хоол, дулаахан бол хоёрдугаар хоол гээд. Гэхдээ одоо нас явж байгаа болохоор биеэ бодож ихэвчлэн шөлтэй хоол иддэг болж дээ. Ер нь хөгширч байна даа. /инээв/
-Эрэгтэй хүмүүс цуйванд их дуртай байдаг шүү дээ. Таны хувьд?
-Дуртай л гээд байдаг юм. Миний хувьд нэг их дуртай биш ээ. Цуйван гэдэг чинь их эргэлзээтэй хоол. Ерөөс хийсэн хүнээс нь шалтгаална. Нэг аргуу цуйван идэж байгаад хахаад үхчихвэл яана. /инээв/ Цуйван бол замдаа гацаад л их юм болж байж ходоодонд маань очно. Шөл бол сайхан гулгаад орно доо.
-Та зөв хооллох талаас нь, хоолны дэглэм барьдаг уу?
-Нэг их сүртэй дэглэм бариад байдаггүй. Яахав өглөө орой идсэн хоолоо шингээх гэж алоетой буцалсан ус уудаг. Түүнээс биш өглөө тийм хоол өдөр тийм хоол гэх мэт хоолны дэглэм барьдаггүй.