Ихэнх эмэгтэйчүүд биохэмнэлд тоомсоргүй ханддаг, эсвэл биохэмнэлийн тухай огт юу ч мэдэхгүй байх нь бий. Гэтэл гоо сайхны арчилгааны үр дүн нь хоногийн ямар цагт хийснээс шууд шалтгаалж байдаг. Хосгүй үйлчилгээтэй маскийг тохиромжгүй цагт нүүрэндээ түрхэчихээд үр дүнг нь хүлээж суух нь харанхуй шөнө биеэ шарахтай адил юм. Харин хамгийн энгийн тосыг зөв үедээ түрхэж чадвал их ядарсан царайг ч үлэмж өөрчлөх боломжтой.
Гоо сайхандаа тавих ажиллагаа тань дээд зэргийн үр дүнтэй, Таныг үзэсгэлэн гоо байлгах зөвлөгөөтэй танилцана уу. Энэ нь гоо сайхны хоногийн биохэмнэл бөгөөд гоо сайхны бүхий л ажиллагааг түүнд нийцүүлэн хийнэ гэсэн үг.
23-аас 04 цаг бол нойрны цаг бөгөөд энэ үед ямар нэгэн үдэшлэг дээр эсвэл ажиллаж өнгөрөөхөд өглөө нь нүүр царай сааралтаж, ядарсан харагддагийгг эмэгтэй хүн бүр мэднэ. Учир нь, хоногийн энэ цагуудад бүх эрхтэн, системүүд амарч байх ёстой бөгөөд энэ үед арьсанд цэвэрших, нөхөн төлжих процесс идэвхитэй явагдаж байдаг байна. Шөнийн ээлжинд ажилладаг хүмүүст арьсны асуудал нэлээд тулгардаг хэдий ч шөнө ажиллахаа болиход эргээд арьс нь эрүүлжиж эхэлдэг.
Өглөөний 4-5 цагт бие махбодь сэрж эхэлнэ. Эсийн нөхөн төлжилт аажмаар буурч, харин биеийн хамгаалалтын хүч идэвхжиж эхэлнэ. Яг энэ үед чөлөөт радикалуудын эсрэг хамгийн ширүүн “тэмцэл” өрнөж байдаг.
Өглөөний 6 цаг – нойрноос сэрэх хамгийн төгс үе. Нар мандахад сэрсэн хүн хамгийн цовоо, эрч хүчтэй байдаг гэсэн дорнын ард түмэн ярьцгаадаг. Энэ үед халуун хүйтэн ээлжилсэн буюу хүйтэн усанд орвол бие организм маш сайн хүлээж авна.
7 цагийн орчимд бие организм бүрмөсөн нойрноос сэрэх ба эрч хүчээр бялхах хэдий ч зөөлөн эд дэх шингэний солилцоо сулавтар байх тул орноосоо босоогүй байсан хүмүүст нүүр нь хавагнах, зовхи хавдах зэрэг бэрхшээл тулгарна. Нүүрнийхээ арьсыг богино хугацаанд засахын тулд цусны эргэлтийг сайжруулах хэрэгтэй. Үүний тулд нүүрэндээ мөс тавих, уураар утах аргыг хэрэглэж болно. Хоногийн энэ цагт нүүрэнд гимнастик хийх, иллэг хийхэд маш тохиромжтой.
8-13 цаг – эмэгтэйчүүд маш сайхан харагддаг цагууд. Учир нь, энэ үед бие организмын бодисын солилцоо хамгийн дээд түвшинд явагдаж, цусны эргэлт, тэр дундаа арьсан дахь цусны эргэлт эрчимждэг тул нүүр, хүзүүний арьсыг эрчимтэй арчлахад хамгийн тохиромжтой.
Үдийн цайны цаг буюу 13-15 цагийн хооронд гоо сайхны ямар ч арчилгаа хийх хэрэггүй, энэ үед гаднын ямар нэгэн үйлчилгээнд ямар ч реакц өгдөггүй. Биеийн хамгаалалтын хүч суларч, бие организмд явагддаг процессууд багасдаг тул арьсны өнгө ч тийм сайхан бус байна. Гэхдээ 14-15 цагийн хооронд үсчинд сууж болох юм. Бие организмд цахилгаанжилт багасдаг тул үсэнд хэв амархан тогтоно.
15-18 цаг- спортоор хичээллэх үе. Булчингийн хүч, хөдөлгөөний эвсэл дээд цэгтээ тулсан байх тул биеийн хөдөлгөөн, дасгал хийвэл дээд зэргийн үр дүнтэй.
18-20 цаг гоо сайхны бүхий л төрлийн арчилгаанд хамгийн тохиромжтой. Нэг талаас, бие махбодь өвчинд хамгийн их тэсвэртэй байна (хэрэв та илүүдэл үсээ зулгаах шаардлагатай бол), нөгөө талаас бүх төрлийн арчилгаанд дээд зэргээр бэлэн байна.
19-21 цагийн хооронд бидний булчингийн ажиллагаа уян хатан болдог тул йог, сунгалтын дасгал хийгээрэй.
22 цагаас хойш бие организм унтахад бэлдэж эхлэх тул гоо сайхны ямар ч ажиллагаа үр дүнгүй болно. Шөнийн тосыг мөн оройн 9 цагаас өмнө түрхэх ба оройтвол бүх л шөнийн турш арьсанд илүүдэл ачаа болно гэсэн үг юм.