Одоо үед нүдээ тас хараас авахуулаад, солонгын долоон өнгөтэй ч болгох боломжтой. Мөн гоо сайхны газар очоод л хүүхэлдэй шиг дэрвэгэр сормуус, урлагийн бүтээл шиг хумстай болчихдог болсон цаг. Гэвч энэ боломжуудын хажуугаар охид бүсгүйчүүд маань эдгээр гоо заслын бүтээгдэхүүнийг буруу хэрэглэснээс, эсвэл сөрөг үр дагаврыг нь мэдэхгүйгээс элдэв өвчлөлд өртчихдөг тал бий. Энэ талаар мэдээлэл өгөх үүднээс нүдний линз, хиймэл сормуус, шилэн хумсыг хэрэглэхэд анхаарах ёстой зүйлсийг бичиж нийтэллээ.

Нүдний линз

• Нүдний бохирдол линзэнд наалдсанаар линзийг дахин зүүхэд нүд улайлт үүсч болно
• Зааснаас удаан хугацаагаар линзийг зүүвэл нүдний торлог бүрхэвчинд хүчилтөрөгч дутагдаж, нүд бүрэлзэж хавдах шинж тэмдэг илэрч болно. Мөн линзнээс болж торлог бүрхэвч гэмтэж, зурагдаж болох талтай.
• Зовхины үрэвсэлтэй болох магадлалтай. Энэ нь зовхины дотор доод хэсэгт үрэвссэн жижиг жижиг гүвдрүүнүүд үүсэхийг хэлнэ. Үрэвссэн зовхитой нүдэнд линз зүүхэнд өвддөг.
• Нүдний хуурайшил бол контакт линз зүүдэг бүсгүйчүүдэд түгээмэл тохиолддог эмгэг. Энэ нь нүдэнд хангалттай нулимас байхгүй болсноос хуурайшиж, ямар нэг юм торсон мэт мэдрэмж төрөх, халуу оргих, улайх шинж тэмдгүүд илрэхийг хэлнэ.
• Зарим хүн линзний харишилтай байж болно. Хэрэв линзийг зүүмэгц нүд огцом улайж байвал харшилтай байгаагийн шинж юм.
• Линзээ зүүхээсээ өмнө ҮРГЭЛЖ гараа угааж занш. Мөн линзнээсээ хамаараад, тасралтгүй зүүж болох хугацаанаас бүү хэтрүүлэгтүн. Линзнийхээ савыг 3-6 сар тутамд нэг удаа сольж байгаарай.

Сормуус суулгах:

• Суулгасан хиймэл сормуус унахдаа төрөлх сормуусыг шингэрүүлдэг.
• Сормуус суулгахаас нэг долоо хоногийн өмнө болон, суулгаснаас хойшхи хоёр долоо хоногийн хугацаанд аспирин болон ямар нэг цусны бөөгнөрлийг хязгаарладаг эм ууж болохгүй.
• Суулгаснаас хойш хэд хоног загатнаж болно.
• Суулгасан сормуус бохирдсон тохиолдолд нүдэнд муугаар нөлөөлдөг.
• Зовхи хэлбэрээ алдаж, гадагшаа эсвэл дотогшоо эргэснээр сормуусыг нүдний алим руу оруулж болно.
• Сормуус суулгасан үедээ нүдээ байнга нухвал суулгасан үсний байр солигдож, эмх замбараагүй болж болно.

Шилэн хумс:

• Шилэн хумс хийлгэснээс болж үүсэх хамгийн түгээмэл сөрөг үр нөлөө бол хумсны мөөгөнцөр юм.
• Шилэн хумс нь төрөлхийн хумснаасаа хөндийрсөн үед мөөгөнцөр үүсэх гол нөхцөл бүрддэг. Учир нь гараа угаахад шилэн болон төрөлх хумсны дунд үүссэн завсарт ус орж, мөөгөнцөр үүсэх чийглэг, давчуу орчин үүсдэг юм байна.
• Мөөгөнцөр нь ихэвчлэн хумсны үзүүр хэсэгт үүсдэг. Мөөгөнцрөөс болж хумс хугарамтгай, хэврэг, өнгөгүй, язарсан болдог.
• Мөөгөнцрөөс урьдчилан сэргийлэхийн тулд та мэргэжлийн, туршлагатай манекюрчин дээр хумсаа хийлгэх хэрэгтэй. Мөн хумсны өвчлөлтэй бол хиймэл хумс нааж болохгүй.