Аз жаргалд умбан амьдралыг хамтдаа туулж байгаа гэр бүлүүдийг нэгтгэх ямар шинж тэмдэг байна вэ? гэдгийг нэлээд судалсны эцэст сэтгэл зүйч эрдэмдтэд 5 шинж тэмдгийг илрүүлжээ.
Хүмүүс танилцаад, дурлаад, гэрлэдэг. Дараа нь зарим нь бүх насаараа хамтдаа, аз жаргалтай амьдардаг бол олон гэр бүл таарч тохирохгүй, хэрүүл  болон салж сарнидаг билээ. Зарим нэг нь салаагүй ч гэсэн ямар ч аз жаргалгүйгээр өдөр хоногыг өнгөрүүлдэг. Канзасын Их Сургуулийн сэтгэл зүйн мэргэжилтнүүд Барбара Керрийн удирдлаган дор олон жилийн турш аз жаргалтай гэр бүлүүдийг судалсны үр дүнд доорхи дүгнэлтийг гаргасан байна.
Оройн зоог
 Аз жаргалтай гэр бүлийн гишүүд оройдоо нэг ширээнд /дугуй юмуу зууван ширээ илүү сайн/ сууж оройн хоолоо идэнгээ ярилцдаг байна. Тэр өдөрт өөрт тохиолдсон сонин содонгоо ярих, элдэв асуудал проблемаа хэлэлцэх, хошин юм ярих гэх мэтээр. Энэ үед телевизор заавал унтраастай байх ёстой, тэгэхгүй бол анхаарал сарниад халуун дотно харьцаанд саадтай байдаг гэнэ. Чухал асуудлуудыг ч мөн оройн зоогийн үеээр хэлэлцэж шийднэ. Гэр бүлийн ямар нэгэн гишүүнд хэцүү асуудал тулгарсан бол бусдынх нь дэмжлэг түүнд маш их тус дэм болдог байна. Гэр бүл ер нь эмчилгээний жижигхэн групп гэдэг онол байдаг. Германы сэтгэл судлаач Берт Хеллингерийн хэлснээр, зүгээр ч нэг групп биш, маш их нөөц бололцоотой групп гэнэ шүү.
Ажил эрхлэлт
  Аз жаргалтай гэр бүлийн бүх гишүүд өөр өөрийн ажил алба, өөрсдөд нь баяр баясгалан өгдөг сонирхол, хоббитой байдаг ажээ. Эхнэр нөхөр хоёр хоёулаа ямар нэгэн ашиг орлого авчирдаг юм хийдэг. Эдийн засгийн статус болон орлогын хэмжээ нь энд чухал биш аж. Аз жаргалын хэмжээ гэр бүлийн эдийн засгаас ер хамаардаггүй нь батлагдсан байна. Энд хамгийн гол юм нь – хүмүүсийн хоорондын харьцаа, нэг нэгнийхээ сонирхолд хүндэтгэлтэй хандах,сэтгэл санаагаа хуваалцах хүсэлтэй байх зэрэг асуудал байдаг гэнэ.
Ганцаардах боломж
  Гэр бүлийн гишүүн бүрт ганцаараа байх орчин  байх ёстой. Сайхан гэр бүлийн гишүүн бүрт, жижиг хүүхдэд ч, өөрийн хувийн орон зай байдаг бөгөөд бусад нь түүн рүү нь өнгийдөггүй, тэр орон зайг нь маш их хүндэлдэг аж. Тус тусын өрөөгүй ч бай, хүн ганцаараа суугаад бодлоо бодох, ном унших бололцоо бүхий булан аз жаргалтай айлд заавал байдаг юм байна. Ялангуяа эрчүүд ганцаараа хэсэг хугацаанд байх их дуртай байдаг. Дээр үед эрчүүд галын дөлийг ширтэн суух дуртай байсан бол орчин үеийн эрчүүд автомат угаалгын машиныг ажиллаж байхад нь ширтээд суух дуртай гэнэ. Дашрамд хэлэхэд, телевизор “гөлрөх объект” болж чаддаггүй, учир нь мөнхийн зүйлсийн тухай бодоход логик сэтгэлгээг хариуцдаг тархины зүүн тал унтарсан байх ёстой юм байна.
Хатуу дүрэмгүй байх
  Аз жаргалтай гэр бүлд эрх чөлөөний агаар ноёлдог. Энд ямар ч хатуу дүрэм, гэр бүлийн гишүүдэд зоогдсон хатуу үүрэг байдаггүй. Аз жаргалгүй гэр бүлд харьцаа муу байх тусам төдий чинээ олон хориг нэг нэгэндээ тавьсан байдаг. Чи ингэж болно, ингэж болохгүй, ингэх үүрэгтэй, энэ бас болохгүй, болохгүй, болохгүй ... Хэрэв гэр бүлийн гишүүдийн харьцааны үндэс нь итгэл, дотно хөнгөн харьцаа, нэг нэгийгээ байгаагаар нь хайрлах бол - гэр бүл аяндаа л аз жаргалтай байдаг юм байна. Ямар ч сэдвээр гэрийхэнтэйгээ чөлөөтэй харьцаж чаддаг, хамгийн гол нь та гэртээ хурдхан харихыг боддог бол танай гэр бүл аз жаргалтай гэсэн үг.
Хуримын бөгж зүүдэг
Хэдэн мянган гэр бүлийг судлахад, эхнэр нөхөр хоёр хоёулаа хуримын бөгжөө байнга зүүдэг бол хүүхдээ сайн хүмүүжүүлдэг сайн эцэг эх байдаг гэсэн дүгнэлт гарчээ. Ийм эцэг эхийн хүүхэд хөгжил сайтай, эрүүл мэнд бие бялдар сайтай, тэдэнтэй эвгүй зүйл тохиолдох нь бага байдаг аж. Учир нь хуримын бөгжөө зүүдэггүй хүмүүс өөрийнхөө гэр бүлийг бүрэн дүүрэн хүлээн зөвшөөрдөггүй гэсэн үг, Тэгэхээр автоматаар, хүүхдийнхээ өмнө хүлээх хариуцлагаа ухамсарладаггүй, хүүхэддээ бүрэн дүүрэн анхаарал хандуулдаггүй гэнэ. Хүүхэд энэ бүхнийг мэдэрдэг болохоор дүрсгүйтэх, зөрүүдлэх зэрэг зан гаргаж өшөөгөө авдаг байна. Үр дүн нь – сурлага муу, ууртай, өвдөмтгэй болох гэх зэргээр илэрдэг ажээ.