Нийслэлийн нэгдүгээр амаржих газрын өргөтгөлийг барихад шаардлагатай 10 тэрбум төгрөгийг “Бороо гоулд” компани гаргахаар боллоо. 150 ортой орчин үеийн амаржих газрын барилга барих гэрээнд Эрүүл мэндийн сайд С.Ламбаа, тус компанийн гүйцэтгэх захирал Жон Казакофф нар өчигдөр гарын үсэг зурав. Иж бүрэн тоноглолтой, орчин үеийн шийдэл бүхий амаржих газрыг хуучин нэгдүгээр амаржих газрын буурин дээр барих юм.

Тус төрөх эмнэлгийн 1954 онд ашиглалтад орсон хуучин барилгыг Мэргэжлийн хяналтын ерөнхий газраас ашиглах боломжгүй гэсэн дүгнэлт гаргасан ч санхүүгийн бэрхшээлээс болоод шинийг барьж чадалгүй удсан аж. Ингээд холбогдох байгууллагынхан “Бороо гоулд” компанийн удирдлагад хандсанаар санхүүжилт нь шийдэгджээ.

“Орчин үеийн шаардлагад нийцсэн эмнэлэг барихын тулд барилгын мэргэжилтн үүд БНСУ-д очиж эмнэлгийн гадна, доторх байдалтай танилцсан. Төслийн санхүүжилтээс гадна хөрөнгө гаргаж, Японоос барилгын инженер урин, чанарыг нь хянуулах юм.

Тэр хүн миний өмнөөс хяналт тавина. Тэгэхээр барилгын чанартай холбоотой асуудал гарахгүй” гэж Жон Казакофф ярилаа. Амаржих газрыг ямар байгууллага барихыг түүнээс тодруулахад “Бид бэлэн болсон зураг төслөө барилгын компаниудад танилцуулж, тэднээс гүйцэтгэгчийг сонгон шалгаруулна. Ирэх тавдугаар сард ажлаа эхлэх төлөвлөгөөтэй” гэв.

Шинэ амаржих газрын нээлтийг 2012 зургадугаар 1-нд хийхээр хоёр тал гэрээндээ тусгажээ.

www.mongolnews.mn - Эх нутгийн чимээ