Дэггүй, сэргэлэн атлаа дэндүү шулуун шударга бүсгүй Манжийн эзэнт гүрний гүнжээр сонгогдсон түүхийг өгүүлсэн телевизийн олон ангит кино 1990-ээд оны сүүлчээр Азийн үзэгчдийг байлдан дагуулсан. Гурван бүлэгт “Хуан Жу Гэг” буюу “Сувд гүнж” киноны эхний хоёр нь Хятадын түүхэн дэх хамгийн олон үзэгчтэй киногоор шалгарч, монголчууд ч тэр шуурганд өртөж байсан цаг саяхан.
Уг киноны гүнжийн дүрд тоглосон жүжигчин Жао Вэй Монголд иржээ. Хятадын кино шүүмжлэгчид улсынхаа урлаг соёлыг дэлхийд таниулж, нүүр царай болгосон анхны жүжигчин хэмээн онцолдог тэрбээр манай улсад гэр бүлийн хамт ирсэн бөгөөд одоо Тэрэлжид амарч байгаа аж. Гурван настай байхаасаа л авьяас нь илэрч, дуулж бүжиглэн, зургаан настайдаа төгөлдөр хуур тоглож сурсан Жао кино ертөнцөд хөл тавимагцаа Азид нэрд гарсан азтай нэгэн.
Жүжигчний гараагаа эхэлсэн бүтээл нь “Сувд гүнж”. Хятад төдийгүй БНСУ, Тайланд, Индонез, Камбож, Вьетнам, Сингапур, Малайзын үзэгчдийг байлдан дагуулжээ. Удалгүй “Шаолины хөлбөмбөгч”, “Дотно”, “Диваажингийн дайчин”, “Мулан” зэрэг кинонд тоглосон нь дэлхийн киноны зах зээлд амжилт олж, Хятадын шилдэг жүжигчин хэмээн үнэлүүлэхэд хүргэжээ. 2008 онд гэрлэж, охинтой болсон тэрбээр гэр бүлийнхнээ олны анхаарлаас хол байлгахыг хүсдэг гэнэ.
Овог, нэр: Жао Вэй
Англи нэр: Вики Жао
Төрсөн он, сар, өдөр: 1976.03.12
Төрсөн газар: БНХАУ, Аньхуй муж, Вуху хот
Биеийн өндөр: 166 см
Боловсрол: Бээжингийн Кино академийг жүжигчний
мэргэжлээр төгссөн.
Эрхэлдэг ажил: Жүжигчин, дуучин
Шагнал: Шанхайн кино шүүмжлэгчдийн шагнал, Шанхайн кино
наадмын шилдэг эмэгтэй жүжигчний шагнал,
Хятадын Эмми хэмээдэг “Алтан бүргэд” наадмаас
шилдэг эмэгтэй жүжигчний шагналыг хамгийн
залуугаараа хүртсэн.
Хүндэлдэг жүжигчин: Мэгги Чиун, Марлон Брандо, Изабель
Хупперт, Жюльет Бинош
Хувийн цахим хуудас: http://www.zhaowei.com.cn/
Facebook хаяг: http://www.facebook.com/pages/Vicky-Zhao-
Wei/9442344098
