Хоёр
жилийн өмнө анхны бие даасан “Ностальгия” тоглолтоо хийсэн дуучин
Б.Баярцэцэг ирэх сард тоглолт хийхээр бэлтгэлээ базааж байна. БНХАУ-ын
“Polo arts” компанитай гэрээ байгуулан ажиллаж, анхны цомгоороо “China
gold records” наадмын “Best classic album” шагнал хүртсэн тэрбээр энэ
удаа эх хэлээрээ дуулсан дуунуудаа тоглолтдоо багтаажээ. Түүнтэй өчигдөр
15.20 цагт холбогдлоо.
-Сайн уу, Баярцэцэг ээ. Хаана, юу хийж явна аа?
-Яг одоо гэр бүлийн хэнтэйгээ хооллож байна. Эндээс гараад шинэ цомогтоо багтсан “Дурласан цас” дууны клипний зураг авахуулна. Их сайхан клип хийлгэж байгаа. Тусгай том байшин барьж клипний зургаа авч байгаа юм.
-Хэзээ, ямар тоглолт хийхээр бэлтгэж байна вэ?
-Тавдугаар сарын 13-нд тоглолтоо хийхээр төлөвлөсөн. Хараахан нэр өгч амжаагүй л явна. Ямар ч гэсэн амьд хөгжимтэй тоглолт байх болно. 22-24 дуу дуулах юм.
-Өмнө нь орос дууны тоглолт хийж байсан учраас энэ удаа эх хэлээрээ дуулна биз дээ?
-Өнөөдрийг хүртэл би дөрвөн цомог гаргасан шүү дээ. Тоглолтод эдгээр цомгийн шилдэг уран бүтээлээс багтааж буй. Гэхдээ 80-90 орчим хувь нь монгол дуу. Хүмүүс орос дуугаа оруулаарай гэж захисан учраас орос дуу дуулна. Бүх дууныхаа хөгжмийн найруулгыг өөрөө хийсэн. Их сайхан уянгалаг, хэмнэлтэй үдшийг үзэгчдэд бэлэглэнэ.
-Амьд хөгжимтэй тоглолт болохоор хөгжимчид чухал. Ямар хамтлагтай хоршиж байна вэ?
-Яг нэг хамтлагтай бэлдээг үй ээ. Төгөлдөр хуурч Пүрэв сүх, бөмбөрчин Одхүү, басс гитарчин Мөнхболд, гитарчин Аатка нартай хамтарч байна. Түүнээс гадна үлээвэр хөгжимчид ч гэсэн оролцоно.
-Дуучин маань өөрөө хөгжмийн найруулгаа хийж байна гэхээр энэ тоглолтыг эртнээс бэлтгэж анхаарал хандуулсан байж таарна. Тоглолтын зохион байгуулалтын талаар сонирхуулаач. Тусгай найруулгатай юу, уламжлалт хэлбэрийн тоглолт уу?
-Монголд тоглолтыг шоу болтол нь хараахан зохион байгуулаагүй ч энэ миний мөрөөдөл. Амьд хөгжимтэй, сонгодог орчин бүрдүүлсэн тоглолт хийхийг хүссэн учраас тайзаа “Гэсү” студийнхнээр хийлгэж байна. Олон жилийн турш хүсэж, толгойдоо боловсруулсан ажилдаа зориулж баг бүрдүүлэх гэж их хугацаа зарцууллаа.
-Шинэ цомгийн дуунуудаас хэдийг нь дүрсжүүлэв?
-Гурван дуу клиптэй болж байгаа. Бүх дуугаа “Нью стар” студид бичүүлсэн.
