МИАТ компанийн нисэх онгоцондоо засвар үйлчилгээ хийх EASA 145 гэрчилгээний хугацаа дууссан учраас олон улсын нислэгүүд саатаж байна гэх мэдээлэл гараад байгаа. Энэ талаар МИАТ-ын хэвлэлийн төлөөлөгч Л.Ундралаас тодрууллаа.
-EASA 145 гэрчилгээний хугацаа хэзээ дууссан бэ. Үүнээс болж нислэг саатаж байгаа юу?
-Өнгөрсөн хоёрдугаар сарын 23-нд дууссан. Үүнээс болж нислэг саатаагүй. Уг гэрчилгээ нь Монгол Улс нисэх онгоцондоо засвар хийж болох зөвшөөрлийн гэрчилгээ юм. Олон улсад нисэх эрхийн гэрчилгээ биш юм.
-Гэрчилгээгээ хэнээр, хэзээ сунгуулах вэ. Сунгуулахгүй бол хохиролтой юу?
-EASA 145 гэрчилгээгээ сунгуулах хүсэлтээ “European Union”-д тавьсан. Одоогоор хариу ирээгүй байна. Гэрчилгээг сунгана гэж найдаж байгаа. Учир нь тус байгууллагын мэргэжилтнүүд Монголд ирж, бидний ажилтай танилцаад явсан.
