Өнгөрсөн өдрүүдэд БНСУ-ын Ерөнхий сайд Ким Хван Шиг-ийн урилгаар Ерөнхий сайд С.Батболд тус улсад албан ёсны айлчлал хийлээ. Айлчлалын үеэр Тавантолгой-Зүүнбаян, Сайншанд-Чойбалсан чиглэлд 1040 км төмөр зам тавих тухай шийдвэр гаргасан гэсэн мэдээлэл сонсов.
Солонгосын newskorea.com мэдээллийн сайтад “Солонгосын төмөр зам, Лотте компаниуд хамтран гурван тэрбум долларын өртөгтэй төмөр зам Монголд барьж өгөхөөр боллоо. Энэ ажлыг ирэх оны хоёрдугаар улиралд эхэлж, 2017 онд хүлээлгэн өгнө” гэсэн мэдээлэл гарсан байв. Энэ тухай Засгийн газрын Хэвлэл мэдээллийн албаны дарга М.Оюунчимэгээс тодруулахад “Монголын тал стратегийн ач холбогдол бүхий ашигт малтмалын орд газрыг ашиглах, түүнийг тойрсон дэд бүтцийн бүтээн байгуулалтад Солонгосын томоохон хө рөнгө оруулалтыг дэмжиж ажиллахаа илэрхийлсэн.
Талууд Монголын эрдэс баялгийг далайгаар тээвэрлэхийн тулд далайн тээвэр, ложистикийн салбарт хамтран ажиллахаар тохирсон. Манай хоёр орны иргэд харилцан зорчих явдлыг хөнгөвчлөх зорилгоор нислэгийн давтамжийг нэмэгдүүлэх, иргэний агаарын тээврийн салбарт хамтран ажиллах тухай хэлэлцээрийг хэрэгжүүлэхэд дэмжлэг үзүүлэхээр болсон” гэв.
