Солонгос сериалыг телевизүүдийн дэлгэцнээс шахна Бүх төвшний уран бүтээлчид Солонгос сериалыг Солонгосчуудтай дайн зарлаад байгаа юм биш. Миний хүүхэд өнөөдөр аба, уба гэж ярьж байна.  Солонгос кино үзэхийг нь цагдаж, хорьж чадахгүй юм чинь яах юм бэ. Түүний оронд өөрсдөө л олон ангит кино хийх хэрэгтэй байх.

Тун удахгүй  “Амьдралд тавтай морил” 80 ангит сериал гарах гэж байгаа.

-“Амьдралд тавтай морил” 80 ангит кино хийж байгаа гэсэн. Ямар сэдэвтэй, юун тухай өгүүлсэн бүтээл вэ?
-Залуусын нөхөрлөл, хайр дурлал гээд мөнхийн сэдвийг харуулсан 80 ангит кино хийж байна. Гэхдээ инээдмийн, хөнгөн кино. Инээдмийн гэхээр жигтэйхэн татаж унахаар биш. Цагаан инээд бэлэглэхээр бүтээл. Холливудын “Friends” гэдэг олон ангит кино байдаг даа. Яг тэр киноны Монгол хувилбар гэж ойлгож болно. Зураг авалт, текстийн бичигдсэн байдал, жүжиглэх арга барил гээд бүх зүйл тэр киноны маневараар явна. Яг хуулсан гэж ойлгож болохгүй. Бид зохиолоо өөрсдөө бичээд, найруулж байгаа болохоор өөр.

-Санаа авах чинь тийм ч сайн зүйл биш биз дээ. Өөр сэдэв хөндөж, сэдэж хийж болоогүй юм уу?
-80 ангит киног өөр сэдвээр хийж болно. Олон санаа байна. Өнөөдөр телевизүүдээр олон орны сериал гарч байна. Солонгос сериал хэчнээн жил гарч байгаа. Гэтэл тэдгээр кино гарлаа гээд залууст ямар санаа өгөв. Юу ч өгөөгүй. Өгсөн юм нь гэвэл өсвөр насны охидууд, хүүхдүүдэд буруу үлгэр, уба, хайраа гэсэн нялуун яриа л байна. Өнөөдөр нийгэм тэр чигээрээ уур бухимдал, асуудалтай байгаа. Тэр дундаа Монголд энэ байдал газар авсан.

Энэ бүхнийг үзүүлээд яах юм бэ. Бид хэллээ гээд хэн хүлээж авах вэ. Бидний санаа байгаа онохгүй. Ийм зүйл буруу байна гээд засахгүй шүү дээ. Түүний оронд үзэгчдийг 40 минут амрааж, ядаргааг нь тайлж, арай өөр юм бодуулъя. Бидний санаа ердөө л энэ. Хүмүүс нийгмээ шүүмжилж, дарга нар ажиллахгүй байна, цалин хүрэхгүй юм гээд л муулаад байдаг. Гэтэл энэ дунд өөрөө хичээх юм бол олон гарц байна. Үүнийг л бид кинондоо харуулах гэсэн юм.

-80 ангитай кино хийж байгаа болохоор өргөн бүрэлдэхүүнтэй бат байгаа байх. Жүжигчдийн багт хэчнээн хүн багтаж байна вэ?
-Олон хүн байгаа. Гэхдээ гол таван дүр байгаа. “Захиалгат инээд” хамтлагийн жүжигчин Ө.Мөнх-Эрдэнэ, Х.Манлайбаатар, УДЭТ-ын жүжигчин Г.Эрхэмбаяр, жүжигчин Э.Ууганбаяр, Дөлгөөн нар тоглож байна. Бүх олон ангит киноны ерөнхий үйл явдал байдаг даа. Гол дүр, эсрэг дүртэй. Хоорондоо зөрчилдөөд, хайр дурлал үүсгэж, нэг салаад нийлээд л байдаг. Харин манай кинонд тийм зүйл байхгүй. Гол таван дүр л 80 ангийн турш гарна. Гэхдээ туслах дүрүүд байгаа л даа. Харин нэг туслах дүр нэг анги дээр л гарна. Тэгэхгүй 10 дугаар ангид гарсан хүн гэнэт 20 дугаар ангид орж ирээд л байхгүй.

-Монголын телевизүүд, уран бүтээлчид яагаад гэнэт олон ангит кино руу хошуураад эхлэв ээ?
-Энэ нь хоёр талтай. Анх сериал гарч эхлэхэд Монголчууд яагаад хийж болохгүй юм гэж уран бүтээлчид хоорондоо ярьж байлаа. Бидний энэ киноны санаа аль гурван жилийн өмнө гарсан. Бүр эхний найман ангийн зургийг нь авчихсан байсан. Гэтэл санхүү, хөрөнгө дээр гацаад зогссон. Уран бүтээлийг дандаа санхүү дагаж явдаг. Тэр үед ивээн тэтгэх байгууллага олдоогүй. Учир нь сериал хийнэ гэхээр эргэлзээд байсан юм. Одоо бол телевиз, тэр дундаа олон ангит кино ямар хүчтэй вэ гэдгийг компаниудын маркетингууд ойлгож эхэллээ.

Түүнээс гадна МҮОНТ-ийн “Хэцүү анги”, “Тусгай салаа” гэсэн хоёр сериал олон ангит киноны суурь болж өгсөн. Энэ кинонууд гарсны дараа монголчууд өөрсдийн уран бүтээлчдийн сериалыг хүлээж байгаа юм байна. Том компаниуд энэ бүтээлд нь оролцох хүсэлтэй байдаг гэдгийг уран бүтээлчид мэдрээд эхэллээ. Түүний хажуугаар бүх төвшний уран бүтээлчид Солонгос сериалыг шахах юмсан гэж ярьдаг. Солонгосчуудтай дайн зарлаад байгаа юм биш. Миний хүүхэд өнөөдөр аба, уба гэж ярьж байна. Би Солонгос кино үзэхийг нь цагдаж, хорьж чадахгүй юм чинь яах юм бэ. Түүний оронд өөрсдөө л олон ангит кино хийх хэрэгтэй байх.

-Кино урлаг нэг талдаа маш том бизнес байдаг. Гэтэл олон ангит кино бүтээхэд их хөрөнгө шаарддаг. Бүтээсний дараа ашиг олдоггүй. Тийм байтал уран бүтээлчид олон ангит кино хийгээд байгаа нь дээрхээс өөр шалтгаантай юм биш үү?
-Арилжааны телевизүүдэд маш том боломж бий болдог. Сериал гаргаснаараа реклам цацалтаараа ашиг олдог. Харин МҮОНТ-ийн хувьд тийм зүйл байдаггүй. Тэдэнд кино хийх нь л чухал. Манай уран бүтээлчид ч гэсэн залуу хүмүүс байгаа. Сэтгэл санаагаар нэгдсэн. Бидэнд мөнгө тийм чухал биш. Уран бүтээл хийе. Чанартай кино гаргая л гэсэн хүсэлтэй. Түүнээс ашиг олохдоо гол биш.

-Жүжигчдийн сонголт, тэр дундаа гол дүр гэдэг кино хэр амжилтад хүрэхийн үндэс байдаг. Найруулагчийн сонголт ийм байв уу, өөр шалтгаан бий юу. Олон чадалтай залуу жүжигчид байна шүү дээ?
-Би өөрөө “Захиалгат инээд” хамтлагийн нэг гишүүн. Бид энэ санааг гаргаад, хийж байна. Эхнээсээ хамт хөдөлсөн, ярилцсан. Харин бусад гол дүрүүдийн хувьд одоо эд жагсч яваа чадалтай уран бүтээлчид. Бүх л кино, шоунд оролцож байна. Авъяас, ур чадвар, хүнээрээ эрэлттэй “бараа” гэсэн үг. Гэхдээ хүн чанар чухал. Бидэнд нэг л хэцүү зүйл гарсан нь эмэгтэй гол дүрийн сонголт байсан. Зураг авалтдаа ороод хоёр сар гаруйн нүүр үзэж байна. Энэ хугацаанд эмэгтэй жүжигчний сонгож чадахгүй байсан. Эмэгтэй гол дүргүй хэсгүүдийнхээ зургийг аваад л явж байлаа. Харин саяхан сонголтоо хийж, Дөлгөөн гэдэг охиныг авсан байгаа.

-Өдөр шөнөгүй л зураг авалтаа хийж байгаа гэсэн үү. Хэзээ дуусах төлөвтэй байна?
-Эндээ байрлаад, зургаа аваад л байж байна. Хажуугаар нь эвлүүлэг гээд бусад бүх зүйлээ хийж байгаа. Ирэх сарын дундуур МҮОНТ-ээр гарна. Их хурдан кино хийж байгаа юм шиг санагдаж байж болох юм. Гэхдээ нэг аргачлал бий. Бид бүх дотор зураг авалтаа нэг л газар хийж байна. Энэ байранд баарнаас гадна хоёр айл байгаа. Хажуу байранд бас айлыг тохижуулсан байгаа. Гол дүрүүдийн маань амьдардаг гэр гэсэн үг. Тэгэхгүй бол нэг газар зураг авчихаад хороолол явах юм бол хэцүү биз дээ. Энэ чинь биднийг хурдан ажлаа амжуулахад нөлөөлж байгаа юм.

-Та бүх зураг авалтаа дуусгаад гаргах гээд байна уу, эсвэл эхний ангиудаа гаргаж байх зуураа ажлаа хийх үү?
-Бид хийж байхдаа киногоо эхнээс нь цацаж эхлэх төлөвлөгөөтэй байна. Мөн 40-р ангиасаа эхлээд үзэгчдийн санал авах байх. Энэ дүрийг яах вэ, үйл явдлаа яаж өрнүүлэх вэ гэдэг санал авна. Кинон дээр Төгсөө гэдэг залуу жижигхэн баар ажиллуулна. Тэгээд гарах хаалганыхаа ойролцоо ваар тавих юм. Төгсөө найзууддаа “Та нар миний вааранд 50 төгрөг ч болов хийж байгаарай” гэдэг. 40-р анги дээрээ энэ ваараа задлах юм. Тэр үедээ “Манай улсад цусны өвчтэй, хорт хавдартай хүүхдүүд их байдаг юм байна. Тэдэнд би туслах гэсэн юм. Сэтгэлээрээ бага ч гэсэн мөнгө өгье” гэж хэлдэг. Түүнтэй зэрэгцээд бид хэд хэдэн газар ваар тавьж, хөдөө орон нутгаар аялуулах бодолтой байгаа. Киноныхоо төгсгөлд нэг ч гэсэн хүүхдэд туслах зорилготой.

-80 анги хэтэрхий урт биш үү. Хүмүүс залхах байх даа?
-“Халтар царайт” шиг үйл явдал нь нарийн гогцоотой, өмнөө хойноо санах юм ихтэй биш учраас залхахгүй. Би итгэлтэй байна. Нэг анги нэг сужет гэсэн зарчмаар хийнэ. 80 ангит киноны 16 ангид нь нэг гол дүрийн тухай түлхүү өгүүлнэ. Ерөнхийдөө ийм маягаар өрнөнө. Бусад кино шиг үйл явдлын зөрчилтэй биш учраас залхах юм гарахгүй. Манай уран бүтээлчид үзэгчдийг залхаахгүй байх үүднээс хичээж байна. Энд би ганц юм хэлмээр байна. Кино бүтээхэд хөрөнгө мөнгө маш их шаарддаг. Тиймээс бидэнд тусалж байгаа хөрөнгө оруулагчдадаа баярласнаа илэрхийлэх нь зүйтэй байх.