Айсуй хаврын гоёлоо хараахан сонгож амжаагүй бол наашаа суугаарай. Энэ жилийн хавар энгийн бөгөөд өдөр тутмын загвартай гадуур хувцас зонхилно. Харахад энгийн ч сонирхолтой эсгүүр, олон оёдолтой пальто, цув болон хүрэм моодонд орж байна. Ерөнхий төрхөөрөө "X" хэлбэртэй бөгөөд нарийн бэлхүүс, дэрвэгэр хормойтой загварууд охид, бүсгүйчүүдийн гоо үзэсгэлэнг илтгэж, эмэгтэйлэг харагдуулна.

Тиймээс бүсгүй та бэлхүүсээрээ бүстэй, "А" хэлбэрийн хормойтой цув, пальто сонгоорой. Гэхдээ хэдий сонин, содон эсгүүртэй ч даруухан, энгийн, бодит байдлаа хадгалсан байвал аятайхан харагдана. Дэлхийн загварын чиг хандлагыг дагаад зөрсөн энгэртэй, мөрөн дээрээ товч, оруулгатай гадуур хувцсыг хүмүүс түлхүү өмсөж, хэрэглэж байна. Өнгөний хувьд манай орны цаг агаарын нөхцөлд хар, саарал, цайвар шаргал болон байгалийн өнгөнүүд илүү тохиромжтой.

Түүнчлэн нарийхан, өвдөг давсан урт түрийтэй гутал энэ хавар давамгайлна. Урт, нарийн хэлбэртэй учраас голдуу бараан өнгөтэй байвал зүгээр. Өсвөр насны охид ихэвчлэн урт, эрээн, шоотой оймсыг богино түрийтэй гутлаасаа давуулж өмсвөл золбоолог харагдана. Урт нарийн гутал савхи, арьсан эдлэлээр хийгдсэн байвал илүү чамин. Танд гэж хэлэхэд моодыг тодорхой хэмжээгээр дагах хэрэгтэй ч хэт хошуурах хэрэггүй.

Биеийн онцлогтоо тохируулан сонгож, биеийнхээ өөтэй хэсгийг ил гаргахгүйг хичээгээрэй. Ялангуяа урт түрийтэй гутал богино, бүдүүн шилбэтэй эмэгтэйчүүдэд зохимжгүй. Нөгөө талaaс энэ жилийн загварын чиг хандлага өмнөх жилийнхээс илүү эмэгтэйлэг шинжийг тусгаж өгснөөрөө онцлог. Өнгөрсөн онд ерөнхий төрхөөрөө "Н" хэлбэр бүхий эршүүд загвар голлосон бол энэ жил бүсгүйчүүдийн гоо сайхныг илтгэсэн сонгодог загварын хувцас, эдлэлүүд олны анхаарлыг татна.